28 AUGUST 2004 - 狼狽

訓到唔捨得起身, queenie 同阿詩 "jit" 我腳板底都冇乜反應. 起身就準備執野走人, 下一站珠海. 首先去附近o既酒樓飲茶, 窮書生繼續扮演大豪客, 係咁叫. 食完又截的士去珠海.

原 本想一程車直接去到珠海o既, 但係o個度 d 的士最多可以載四個人, 我地想一次五個, 好難先搵到一架的士肯載五個, 但係又講唔岩價...阿鴻係一個精明o既消費者, 係咁講價, 我又係上第二架車, 又好似尋日咁, 第一架車走又之後就開始落大雨. 好難先搵到車, 我又要閉目養神, 未過關我地就要落車了. 其實的士司機唔肯載五個就係因為驚過關比人查到.

落左車之後就上巴士, 跟住就去到珠海粵海酒店, 我地一行十人, 一齊去 check-in 會好礙眼, 咁就淨係搵兩個人去 check-in, 其他就o係附近等. 攪左好耐先上到房, 擺低 d 野, 休息一下又起行, 去玩小型賽車. 途中又係咁落雨, 成身濕晒, 極之狼狽.

好彩個車場o係室內, 唔會攪到我地冇得玩, 一次過買十張飛送頭盔喎, 即刻問:"要黎做乜?" 玩之前要等人地玩完先, 淨係睇都覺得驚! 真係好快!

好 快到我地喇, 好緊張, 最驚係有意外, 自己傷或者整傷人都唔好. 架車真係好快, 我都唔敢踩盡油, 好多時都收油, 見到有員工我就一定會慢駛. 玩到一半我開始有 d 後悔, 好似搵命搏咁... 玩完一場之後, 唔知點解我又想玩多轉, 咁就去啦~ 我都係唔知自己想點o既人...今次玩得比第一次大膽! 大膽極都唔係好放, 點都係怕發生意外. 不過都係有意外, 一邊轉彎一邊刹車, 咁就比人撞喇, 好彩冇乜事. 阿鴻真係一個玩開車o既人, 手車好辣!

玩完車就搵地方食野, 又係落住大雨... 呢個地方真係唔多好呀, 成日都見到水浸, 地方又 dirty, 水浸 d 水可以 "sin" 死人o既... 是是但但就食左一餐, 其實味道唔差的, 只衛生環境欠佳. 呢度 d 餐廳好多都"中西合壁", 我地食呢間呢, 又有 pizza 食, 又有楊州炒飯...

食完就去腳底按摩, 第一次咋, 一講按摩我就諗起o個 d "特別服務"... 我地一大班人去o既就梗係正經架啦~ 本來計劃食完野去水上樂園玩, 因為天氣唔好, 所以取消了.

感 覺幾舒服, 過癮咯, 過癮之外我又唔覺有 d 乜野. 我比佢修甲, 佢話我d 指甲"倒生" 喎. 好快就整左一個鐘, 幾舒服o既, o個陣都六點幾七點喇~ 全程有阿 max o係度吹水, 攪氣氛, 點都要有人攪氣氛o既~ 原來呢個"骨場", 按摩兩個鐘就可以過夜, 咁咪酒店錢都慳返!? 下次識做喇. 臨走之前, 我地見到有餅乾, 紙包飲品任拎, 咁大家都唔客氣了! 頭盔就用黎裝贓物喇.

跟住就 落附近o既地下商場, 見到有鞋鋪就入, 想買老翻鞋.... 仲有周圍行下咯, 見到有 pancake + 雪糕, 十蚊份, 真係貴! 總括都算係好食. 不過咖啡雪糕就強差人意, 想點? 唔通想 haagen daz 咁好味咩~ 阿鴻買乜都不忘講價, 去玩車又講, 買pancake 都講, 不過人地都企硬...

跟住我地見到水晶手鍊, 阿鴻又去講價喇, 今次都有 d 成果~ 我都趁熱鬧買左條. 買完之後就買豬扒包食, 十個人叫五份... 唔夠飽啦~ 跟住就兵分兩路, 五個男o既就去買鞋, 女o既就去睇書. 行完一轉之後, 大家都揀好款了, 又係講價時間喇, 佢地都企得好硬好硬, 我地最後o既絕招就係拉隊走, 唔買~ 哈哈~ 其實個價大家都負擔得起, 只係想平 d o者.

我地講好左九點集合, 我地可以, 但係未買到野喎~ 部份女仕們買左書, 阿詩同 queenie 買左本 who move my cheese, 阿詩仲加多本.. 我都唔記得左叫乜野名o既書, 但係對佢有用的. athena 就最實際! 買左本麥嘜. 開左學就會好忙, 實在係冇時間睇咁多字o既書呢~ 除非有好大o既決心啦~

最後我地都買左對鞋, 價錢都係企硬, 冇得平.

跟 住就起行返酒店, 又係冒住雨呢~ 中途見到一間賣墨魚丸o既, 三蚊三粒... 唔抵食. 跟住見到一間野叫"東瑩炸雞", 塊地又係超滑, sin 得死人, 除左有炸雞賣, 仲有中式麵食, 又有焗飯. 可能以上就係呢度o既特色. 咁就食下野先啦~ d 野都唔差架, 但係地方就 dirty 少少囉. 隨隨便便食完就走人喇, 我都唔係好飽.

佢地諗住返酒店之後落 D, 最後唔知點解都係唔去咯, 可能太累喇~ 大家就留o係酒店鋤下 D, 睇下電視, 執頭執尾, 咁又一日喇.

今晚有奧運女排o既決賽, 我就一邊睇, 一邊寫尋日o既日記. 都唔可以話我睇o既, 我冇開聲的. 阿禮咁大份, 我仲同佢同床訓, 真係搵黎賤呢~

阿鴻好gentleman, 一路都幫大家講價, 一路都好照顧大家呢~