07 AUGUST 2004 - "柒里香"

今日同屋企人出去食肯德基. 同屋企人食飯, 通常都係未到兩點幾都食唔到, 好彩未餓親...
家姐話想試下新出o既日式薄餅. 想叫個二人餐三個人食, 肯德基真係識做生意, 話二人餐淨係閒日先有.. =.="
咁就叫三人餐喇, 有九件雞, 一件薄餅, 四件餃子.
薄餅真係細塊得可憐, 餃子都係想像中o既急凍餃子. 九件雞最後都係食淨三件, 要拎走了.
如果胃口好 d 我應該可以食多d 的. 可能都係唔係好慣咁遲食飯, 攪到冇咁好胃口了.

食完野就行百佳, 之後就行吉之島, 都好呀, 返到屋企咪又係齋坐等時間過.

o係吉之島門口見到李柱銘喎! 冇乜野呀, 笑容滿面咁咯, 同我阿媽握手, 可能覺得佢似無知婦孺, 咁咪可以呃票咯~
好似之前 d 人鬧佢係漢奸喎... 不過如果要我即場行埋去鬧佢, 我會鬧佢"製造噪音"! d 助選團好嘈呀!

返屋企途中阿媽又同我同家姐講返"開心大發現"事件, 我收到o既訊息係舊的, 尋晚已經收到了!
阿媽又遇到一個都係住太古城o既朋友, 佢就話城市理工o個科"工乜野管理" d 畢業生好搶手, 比人請晒喎~
工程管理呀? 係喇~ 都唔知邊度聽返黎的... 奇怪就係佢點解要講城市理工呢? 我又唔係讀城市或者理工, 佢o既仔女兩個都係hong kong U o既. 真係廢 up...

行完就返屋企, 訓覺, 訓醒就去踢波了. 好似個個星期都係一樣咁, 訓覺...踢波...
今日傅詩俊, 通常都叫佢做腐屍, 返左黎香港, 黎埋維園. 諗住一齊食飯.
好彩冇令佢失望... 一班波友話踢完波就北上, 去"dum 骨", 幾驚佢地連飯都唔食就上去呀.
佢地都有叫我上去架~ 不過我真係冇乜興趣喎... 唔理正唔正經啦~ 不過佢地去o既應該都係正經o既.

食完野, 腐屍話想飲酒, 其實佢係話擘酒唔係飲酒... 呢度香港呀, 酒貴呀!
franco 又話唔想咯, 怕貴喎. 我有諗過同佢兩個人去bar 的, 但係nuts 都唔平架喎!
我諗我同佢講我o既故事都可以講成粒鐘o既~ 咁算咯~ 返屋企咯.

返屋企就將周杰倫o既新歌由頭聽到落尾... 除左第一首<我的地盤>有需要擺o係第一首, 其他我都聽唔出乜野連慣性了.
可能我唔係 queenie o個 d 忠實 fans 吧... ^^"
<外婆>寫得好感性, 中間一段係咪佢o既自白呢?
其他o個d 講打仗三國o個d 我就唔知佢唱乜了, 算啦, 我都係鐘意聽 d 簡單 d o既, 好彩都有幾首簡簡單單的.
<"柒里香"> 真的不錯! 歌詞都唔錯, 通常我會注重歌詞多過 melody.