27 AUGUST 2004 - 驚心動魄

今日係北上團o既第一日, 天陰, 不停都落住毛毛細雨.
呢個團有十位團友, 有我, 阿鴻, 阿禮, sam, max, queenie, suki, cathy, athena, 阿詩...
約八點鐘, 我遲到了, 唔重要, 架旅遊巴話就話八點到, 最後都遲到了. 三個半鐘o既車程真係唔容易捱! 司機比我更辛苦... 我過關o個陣係咁比大陸個公安門, 問長問短, 你咪又係比我過關~ 煩死. 一班窮書生一黎到中山就變左大豪客, 叫野食好似唔洗錢咁. 係咁叫埋單都係廿幾蚊一位.

跟住就去今日落腳o既地方, queenie 老豆o係中山o既屋企. 我好容易用上次同阿成佢地去祈福新村o個個 trip 同今次呢個比, 所以咪大失所望囉~ 上次o個間大屋好正, 設備又齊, 今次就平凡少少, 仲要行七層樓梯呢~ 我都係太少吃苦. 一入到去, 間屋好似十年冇人住過咁, 佢地一大班人就幫手執屋, 拖地... 我都唔知有乜好做了, 簡單野就比我做啦!

執完野就開始出去玩喇, 人生路不熟, 我地以的士代步, 截一架的士, 首先要問肯唔肯載五個人, 第二件事就係講價, 呢度唔鐘意跟咪錶? 阿鴻就好似地膽, 好熟路咁. 我就真係唔多清楚做緊乜, 我地就到左一個好似海洋公園o既地方, 叫"泉林旅遊山莊". 首先玩左架過山車, 其實只係 level 1, 但係足夠令我嗌晒救命, 同我同車o既阿詩就係咁笑, 我都唔知點解會咁驚, 個人越大, 反而越驚, 點解? 可能人越大就越覺得生命寶貴. 跟住就去玩滑草, 真係?苦黎身! 天氣好焗, 好濕, 攪到成身都係汗, 對鞋又重.... 開始滑, 個個都一仆一碌, 成身都係泥... 我玩滑草都係嗌晒救命咁, 滑到第三次, 我終於冇跌低啦!

滑完就玩碰碰船, 碰碰車, 係咁撞人, 好玩! 跟住就係驚心動魄o既時間, 玩海盜船, 真係驚, 勁驚, 未必真係知有乜咁好驚, 總之就係驚.

驚完就要出返去, 我地位處o既地方好偏遠, 的士都唔多架, 最後我地上左架巴士, 呢程又係好耐, 我又係咁訓, 落車行一陣就搵間野食飯, 呢間野食住家菜o既, 好食! 不過得老闆一個人負責, 辛苦...

食飽就去 spa, 住家菜老闆就話行廿分鐘就到, 可能佢地行慣啦, 我地呢 d 唔係行慣, 行半個鐘都未到, 途中就呃自己, "行左一陣o者", "好快就到"... 一路都落住毛毛細雨, 呢個北上團真係唔多順利!

終於去到喇, 個個都要買頂泳帽先, 跟住就好似平時去游水咁, 換衫... 見到個池都係忍唔住落去游兩轉先~ 不過今日黎唔係游水呢~ 跟住就玩水力按摩, 浸溫泉, 焗桑拿. 桑拿有乾蒸, 濕蒸同埋冷療... 濕蒸間房成陣牙膏味.. 玩完就返屋企咯. 唔知點解, 搵的士好似好難咁, 冒住雨咁搵的士, 十個人分兩架, 我就坐第二架, 第一架一走, 個天又開始落雨, 上車之前, 買 d 蒸溜水先.

落車之後又上返七層樓, 今次要靠電筒照明呢~ 返到屋企就鋤 D, 佢地又打下麻雀... 用親啤牌玩o既野我都係唔夠阿 SAM 玩.
跟住就訓覺喇.