12 AUGUST 2004 - "奶撻"

今日就照原定計畫, 朝早十一點去淘大花園打保齡. 個個都遲到... queenie 就話join 埋阿詩, 所以遲 d 喎...
咁我, 阿鴻, sam, suki 就去打保齡喇. 淘大呢個名就聽得多, 不過原來我都唔係第一次黎...
咁就開始打喇~ 諗住上次都打到, 今次應該都可以的! 點知呢...唔掂喎 ~_~
點知第一次打o既 suki 都要好過我...而且係好好o個隻!
係今年o既第一次, 今個月o既第一次定係今日o既第一次呀? 應該真係第一次咯.
阿 sam o既表現都冇走樣, 阿鴻都打得不錯.

遲到o既 queenie 同阿詩終於到喇~ 咁六個人就去食飯, 食完飯起程去赤柱喇.
諗住去柴灣再轉小巴. 有兩件有趣的事就發生了!
事件一, o係地鐵車廂見到一個癲婆o係度大嗌, 癲婆好熟悉政治, 又講台灣又講美國, 仲講到好似好有道理咁.
事件二, 我明明見住o個個出口一出就可以直落去小巴站, 我居然冇出聲, 照跟,
跟住佢地行錯路, 錯有錯著, 就見到有個 VTC o既檔, 嘩~ dr. yuen o係度喎! 好耐冇見! 我以前成日打攪 dr. yuen 的.

去到赤柱正灘, 太靚啦! 但係附近o既士多賣野太貴啦! 咁就去附近買野喇, 大家一齊去陪 suki 買泳衣, 再買野食, 買野飲...
o個度間惠康都靚過人的!

又行返去赤柱正灘, 換衫, 咁就玩水喇~ 今日冇乜陽光, d 水好凍呀! 不過一陣就唔覺架啦.
突然有個吹氣波波吹左過黎, 咁就踢下先, 原來, 係隔離的... 咁我地就比返佢喇.
跟住佢又借比我地玩. ?_? 落水就游水喇, 游到咁上下就上玩馬騮搶球, 玩到咁上下都係上返水玩.

佢地成日都話要幫我黎一次"下水禮", 以代替前兩日的蚊池... 我對佢地都唔差呀~ 唔好咁對我啦.... 好彩最後都逃過一劫.
久唔久就玩下水戰啦.

楊健鴻全日都冇落水, 話冇第二件衫喎~ 不過女仕們都唔理三七廿一, 照樣整濕佢... 奸人! 原來早有後著的! 根本就有衫換.

游到五點幾, 沖身, 就走人啦, 去 athena 屋企打邊爐, bonnie 同埋 cathy 都o係o個度. 去之前就去百佳買野先.
全程我都著住條濕o既泳褲同波褲, 而且又有好多沙, 所以上到 athena 屋企都係唔坐得!

個個都話我沖涼沖得耐... 咁就攪到我最尾先沖喇. 扮晒有 gentleman 風度, lady first...
食完野就一齊睇電視, 一邊睇一邊吹水. 大家睇<棟篤神探>睇到入晒神.

睇完<棟篤神探>, 可怕o既時間就發生喇. 佢地叫我坐中間, 我坐, queenie 就手持 DC, 拍片...
佢地玩每人問一條問題...問題好尖銳! queenie 第一句就問我仲有冇鐘意以前o個個, 咁我就話"冇".

第二條問題係: 依家有冇鐘意邊個, 咁我就話"有", 唉~ "奶撻"了!
佢地對邊個咁唔好彩, 比我鐘意好好奇, 係咁問, 問就問得間接, 不過答案就呼之欲出...
混亂間我都唔知自己答左乜野咯~ 打死都唔講架啦!

跟住阿詩拎左個 comlumbia o既袋出黎, 呢個袋佢拎住成日架啦~
原來係我o既生日禮物! 原來係一個背囊! 呢隻顏色對我黎講好特別, 比我自己買一定唔會買呢隻色, 咁咪仲特別~
呢 d 就真係驚喜啦, 感動呀! 除左多謝我都唔知仲有乜野好講喇. 第日對大家好 d 啦!

夜喇~ 我都係走啦~ 阿 sam 又捉住我, 我又懶懶地, 咁我就留低啦~ 有我, 阿詩, suki, athena, sam 五個o係到.
有乜玩呢? 打麻雀, 我應該估到架啦~ 阿 sam 同 athena o係度嘛~

我同 suki 都唔識打的, 咁一齊就岩啦~ 打打下電視又有波睇, 一心不能二用的! 我都係睇波多過打麻雀.
我地好好彩地整左一次"清一色", 點解清一色呢? 講左好耐我大概都明o既, 其他野就仲未學識... 佢地都係高手來的!
好似知我地想要乜野牌... 但係最後埋單居然唔洗賠錢, 仲有得賺喎! 我都唔知點計的...

之後就睇波, 睇完波就訓覺了...身為客人, 居然一個人訓一間房, 真係唔好意思呀...