17 AUGUST 2004 - 與麻雀高手過招

今朝約左 max 下晝去游水, 咁我就返去食飯, 佢地去 LG1 飲茶.

飲完茶就去 concourse 行下, 佢地要 training, 但係又唔洗急住上去, 慢慢黎o既... 咁我就去開張m-power 信用咭, 因為應承左 suki 幫佢換 mcdull 燈. 出咭 o既禮品除左一盞燈, 仲有兩張戲飛, 阿鴻話想要, 哼~ 我估佢都係見有著數就想要, 都唔知係咪真係睇o既... 好似都未聽過佢話睇戲... 最後都係我收返埋, 都冇用啦~ 我唔睇戲o既, 或者話我唔會好似francis 咁一個人去睇戲.

攪掂晒都係兩點幾, 阿 max 要三點幾先 available. 中途就搵阿詩"攝時間", 周圍遊, 又去 library, 又去 SAO, 最後入 barn B 坐... 原來 library 唔再用影印咭, 用八達通! 好方便. 中途見到吳維勛... 成鬼日都見到佢o既...

等到咁上下, 我就去沙灘排球場搵 francis, 比支閃光燈佢. 又睇下d 人玩合球, 合球個樣好似足球, 一腳踢落去, 好硬的...

終於等到阿 max 游水啦~ 可能最近睇奧運太多, 兩個人見到跳水板開左, 都唔抵得咁想跳下水. 我企o係塊板, 覺得好驚, 我有少少畏高的. 我o個 d 都唔算係跳水, 爬落去o者... 淨係玩左一次咋~ 唔夠啦!

游左唔係好耐, 就搵佢地打羽毛球... 呢個係一廂情願o既想法, 我地都 book 唔到場. 最後打左一陣乒乓波...

跟住o既時間就係賺錢o既時間, 將自己買 notebook o既 quota 賣左去就賺 $700, o個個買家唔係好夠 cash, 我地唔係個個有得賣 quota..

攪下攪下就攪到九點幾. 一大班人落 seafront 食飯, seafront 搬左去 new hall 樓下, 地方係大左, 但係冇電視睇喎~ 今日有八個人: 我, max, 禮, 鴻, sam, athena, suki, queenie...

可能過左食飯時間, 又或者係碟飯太大碟, 好似得 max 食得晒. 食完飯就一齊上hall 2, 搵班 IE 人攞副麻雀, 嘩... 班人呀... 霸左十樓個 common room! hall 2 十樓, 會勾起我o既回憶, 都係少去為妙吧.

一大班人去返 new hall 8 樓o既 common room, 開始打麻雀咯~ 我呢個 beginner, 居然夠膽同一班麻雀高手過招...我真係唔識打架, 有糊都未必識食.

就黎十二點, 我地就落去食糖水. 食完就買 d 零食, 比人屈左 $20 T_T

跟住o既時間就係打麻雀, 睇奧運, 咁就攪到四點幾... 最後我輸左 $20, 請大家食野仲要比錢, 想喊...... 聽住阿禮同 max o既指導, 都唔知信好定唔信好, 古古惑惑咁...

房 就得一間, 但係有八個人喎! 點算呢... 首先將兩張床拍埋一齊, 訓到四個人, 再鋪張蛇床可以訓兩個, 仲有兩個就去common room 鋪蛇墊, 點知... 有個 staff 上黎話 common room 唔比咁樣訓喎... 四點幾唔訓走上黎睇我地, 真係相當稱職...

最後就o係間房鋪蛇墊, 四個人訓一張墊... 熄晒燈, 唔知邊個話想傾心事, 其實咪又係搵答案, 上星期我冇講o既答案... 無可奉告啦~ 阿禮就話地下好多塵, 個鼻敏感, 最後一個人上網...

已經五點了, 我都未訓得著. 聽朝佢地九點就起身, 要去 training, 我諗我都會比人嘈醒架啦~