23 SEPTEMBER 2004 - considerate

今日終於唔係九點堂, 訓到十一點幾, 上十二點堂, 不過我都係遲到, 總之第一堂就一定會遲到.

又係冇 LUNCH 食o既一日, 要等到三點幾先有得食, 食 tea. 今日o既 huma 講老子, 大家就對老子所謂o既"真理" 作出一連串的討論. 咁乜野係真理呢? 永恆不變o既就係真理了. 咁 1+ 1 = 2 咪係真理!? 唔係, 二進制o既時候已經唔成立了, 仲有 "1" , "2" o既定義係可以改變的, 所以唔係真理..

跟住又去上堂, 咁就上晒堂了. 落堂就去左開會, 開完就去左燒烤, 今次同跆拳道o既人燒烤. 我覺得人地攪o'night 好過我o既 photosoc, 人地準備埋紙巾, 飲品係凍o既, 食物o既選擇都多 d. 不過貴 d 喎, 真係一分錢一分貨? 今日有三個爐, 其實係分緊三個 channel, 一個係英文台, 一個係廣東話, 一個係普通話. 識o既就會一齊玩, 唔識都好難混得熟, 呢樣野係必然的. o個班莊員都幾認真, 覺得有問題就即刻開會檢討.

唔知點解會應承左阿詩燒 d 野比佢食, 所以我就帶埋個食物盒去, 一邊燒, 一邊擺 d 野落去啦, 都冇所謂啦, 我唔食佢地都係浪費架o者.

燒完就拎 d 野去 magic 間房, 等埋阿詩一齊食, 食完就同 magic 打 winning, 一去到 common room, 有個女人話自己精神有問題, 叫我地唔好咁嘈喎, 神經衰弱咋? 唔係真係有問題嘛...

玩完就返房, 做功課, roommate 帶左一位朋友入黎吹水, 咁我就出去 common room 做. 見到阿勛喎, 佢話我呢層 d 人好, 見到佢地o係 common room 傾計, 會迴避一下. 呢 d 唔係基本禮儀嗎? 阿勛就就好多人連呢 d 野都唔識...

做做下功課, 對面房o既 IE freshman 走埋, 問我" c++ 要做功課咩!?", 原來佢一直以為我係 freshman, 但係我從來冇同佢上過堂, 佢唔會覺得奇怪咩?

做完功課, 返到房, roommate 個朋友仲未走喎, 一直o係間房係咁傾, 傾到四點, 我都要訓覺, 佢地都唔識收聲, 唔收聲算喇, 又唔會細聲 d, 或者去第二度傾, 完全唔識尊重人. 直到五點, 我都未訓到, 好想行落去打佢, 鬧佢一餐, 但係, 比返少少面都要o既, 有人o係度嘛. 未必完全關佢事, 其實係我訓唔著.

佢地兩個人熄晒燈, 係咁傾係咁傾, 佢完全唔會考慮我第二朝九點堂, 老實不客氣. 但係一個十九二十歲o既人唔係真係呢 d 咁基本o既野都唔識, 要人教下話... 總之就好唔 considerate 啦. 可能我太客氣喇, 唔通真係要以暴役暴? 無謂啦~ 好好學習相處之道吧.