上十一點堂, 訓到十點幾. 諗住上堂之前去睇醫生, 太多人了! 唔睇住. 上堂就半遊魂狀態, 落堂就去食飯, 一陣要返屋企去搬電腦. 走之前又係諗住睇醫生, 又係太多人, 又唔睇住. 返屋企又繼續執野走, 部電腦都係唔可以搬返去, 壞壞地o既, 我諗係條 ram 壞, 咁就搬部電腦去灣仔整, 好彩我懶得去深水步, 好彩我叫佢幫我砌埋, 咁我先可以去灣仔整機. 等左個幾鐘先輪到我. 期間去左買喇叭, 想買埋拖板, 好貴喎! 要五十蚊以上! 係喇, 換左條 ram 部機就正常返, 好極!
跟住又搬部電腦返 hall, 又係冇人o既... 真係攪錯! 一條鎖匙攪咁耐... 咁我就去阿 tim o個度坐下喇, 順便上下網, 我仲未買 mon. 出事喇, o係佢間房做電燈膽, 佢o既女朋友點睇都掂過以前鐘意佢o個個, 真係識揀喇. 坐到十點左右, 佢同我搬部機返上去, 今次有人喇~ 擺低部機我又落左去搵同學仔食飯, 佢地成班友玩乜鬼"航空訓練", 玩到十點幾先食飯.
食完飯都唔係好飽, 唔知做乜成日都唔夠飽...跟住就諗下有乜野做呢... 係! 未寫 training log sheet! 咁就去阿詩間房抄喇. 原來佢仲係唔捨多得以前o個個. 我又唔會好似佢咁, 可能係我o既經歷唔及佢深吧, 或者係佢長情啦. 不過我都係比較愛錫自己, 唔想令自己辛苦, 所以唔再喜歡糾纏了, 我怕受傷.
媽媽打黎問我做乜唔返屋企喎, 我同佢講話星期五先返, 都係未講我住 hall 喎. 我都係鐘意當面講多過電話講. 唔講真話我個心都會覺得唔舒服... 但係住 hall 都唔係乜野壞事呢... 如無意外今年係最後一年o係 UST, 唔住就冇機會了.
Saturday, September 11, 2004
Subscribe to:
Post Comments (Atom)
No comments:
Post a Comment