今日係唯一一日唔洗返九點鐘(睇時間表黎講), 咁我訓到十一點幾, 慢條斯理咁出門口, 慢慢行落去睇醫生, 又係太多人! 見到牙醫, 我諗起我好耐冇洗牙, 咁就 book 左個時間, 原來都幾旺場, 我book 左下星期四九點.... 跟住就慢慢行上 SAO 攪八達通學生優惠. 時間係十二點九分. 跟住就慢慢行去 library check email, 見到阿鈞, 突然諗起, 我十二點要上堂! 唔係十二點半! 咁就即刻飛入去上堂喇. 雷鼎鳴都係一名吹水怪, 講到自己好勁咁, 係咪真係呢? 唔知. 跟住就去食飯, 食完飯就出去買 mon, 多謝阿禮同阿鴻呢兩個義工! 去觀塘買 mon 真係蝕呀! o個個地方勁遠, 要坐的士, 最後用左三十幾蚊坐兩程的士, 咁個 mon 呢? 普通貨呢~ 間公司o既環境勁唔掂, 仲叫我叫 d 同學仔上去買... 咪玩啦~ 計埋的士錢, 即係用左二百三十幾蚊. 咁尋日o係灣仔抵 d 喎, 明碼實價二百三十蚊, 冇咁嬲呀! 最後都趕得切返去上堂, 好彩~ dept head 又係吹水怪黎o既, 真係唔好彩, 科科都係吹水怪!
落左堂, queenie 呢排真係好即興, 提議話出去深水步食壽司, 因為o個間野平, 佢地唔等我返 hall 放低個 mon 先, 就出左去, 霸位喎~ 個 mon 放左o係 IE 個 counter. 阿鈞就陪我返去放低個 mon, 順便睇下我間房乜野環境, 咪就係乜都冇囉~
跟住我就去深水步喇, 途中見到 account o既 groupmate tracy, math year 3, 真係唔簡單呀! math o既 level 1 course 已經可以 KO 我了! 佢要讀 5 科 math, 每科 4 個 credits, 真係得人驚. 我同佢講我去深水步食壽司, 佢已經知邊間了! 真係咁出名架... 阿鴻可黎話食住等, 我真係唔信喎, 吹水啦你~ 人地等成個幾兩鐘先有得食, 佢地點會咁好彩呀~
去到西九龍中心喇, 去埋廁所, 慢慢搵, 佢地未入到去啦~ 原來又係得個幾丁友, 我, max, 鴻, queenie, suki... 呢間野食迴轉壽司的, 我地個位好衰, 係尾黎的, 前面就有新野係咁上, 我地就坐最尾... 要出去搶野食. 任食的, 岩晒啦~ 我大食呀!
食到咁上下我都夠喇, 我又去搵拖板, 實惠真係實惠, 廿蚊都唔洗就買到了! 不過得一米長, suki 話唔夠長, 咁我就去換個兩米啦.
呢餐埋單 $44 一位. ok 啦~ 跟住就返 hall, 今晚十一點半開樓會喎, 乜野黎架呢?
今日大家o既話題都係我o既 soc, 都係講緊証件相o個件事, non-member o個個價的確係貴呢~ 佢地係咁鬧, 以前我一定會幫住個 soc, 依家我冇所謂, 我都唔理咁多了. 即係如果係我負責我唔會刻薄自己人呢~ 可能大家會話好彩唔係我負責呢. 左右做人難, 兩邊都想幫呀. 可能我呢 d 咁"唔現實"o既性格會令我唔到大事.
源哥o係四樓屈蛇, 我諗住落去摺下, 摺到咁上下先上去, 好莊 mate 阿 tim 打黎召我上去六樓開樓會, 佢唔知係咪唔太了解我, 定係喜歡惡作劇, 係都想推我出去做野, mechan roommate 比人推左做樓主, 作為佢o既 roommate 都要做返少少野... 樓主房嘛...
樓會係乜野呢? 好似丐幫大會咁, 有幾個"元老"主持大會, 有其他層o既人o係度, 好似其他幫會咁. 我個人就唔鐘意呢 d 場合, 呢 d 氣氛. 選左樓主, 就要行落三樓"猛男會" 踩場, 途中都走左唔少人了, 今年 d 人比較摺, 好呀, 岩我!
落到三樓, 六樓o既樓主要"挑機", 三樓就搵左個人出黎, 玩變態野呀, 兩個男人玩"mit lin", 玩到流血呀... 我呢 d 餚底之人梗係企埋一邊睇啦~ d 人睇住呢 d 野會好開心, 睇到笑, 我唔識笑咯. 三樓 d 人都係摺, 聽講上年係好熱鬧的.
玩完喇, 我又搵源哥吹兩句, 跟住就返房攪我部電腦喇, 攪到三點幾先訓呢~ 聽日返九點...
Saturday, September 11, 2004
Subscribe to:
Post Comments (Atom)
No comments:
Post a Comment