17 SEPTEMBER 2004 - 段練體能

17 SEPTEMBER 2004

又係九點堂, 上到一點鐘, 跟住就食飯. 飯完飯其他人要影証件相, 成大班人去我個 hall. 我就一個人去匯豐銀行入數. 坑口好似有一間, 我就坐小巴去到坑口, 死... 原來坑口冇的! 要寶林先有! 咁我又去寶林, 去到人山人海, 好似公立醫院輪候睇街証. 匯豐有六種服務, 即係有六條隊, 我排 "C" 隊, 條隊去到 408, 我排 432, 時間淨返廿分鐘, 我就要返學校上 safety training course, safety training 一年先開到一次, 所以唔可以唔去. 等左五分幾鐘, 我條隊淨係行左一個, 但係佢地明明有十個櫃位, 十個都有人... 咁我好嬲, 是但搵個人鬧"你地有十個人, serve 六條隊都可以咁慢, 有冇攪錯...", 佢只可以講"唔好意思"... 跟住我都走左喇, 打返去 sao 問, 雖然今日係 deadline, 但係下個星期交都可以...

又趕返去上 safety course, 都係一 d 以前聽過o既野, 不過再聽過都好的. 完左 safety training 之後就傾 project, 傾完就去游水. 今日唔敢游得太用力, 一陣要上跆拳道o既 course 嘛. 游左個幾鐘就上水, 返 hall 食少少野, 就起行喇.

佢 d 訓練好多都係練體能的, 當然, 做乜都要有好o既體能. 最辛苦就係要拉筋, 如果從少開始拉就最好. 仲有遇到 nicole, patrick 呢兩個 ieem freshman, 又遇到兩個住同層o既人, 不過我仲未記得佢地叫乜野名.

練完之後隻腳好累, 同 nicole 去 seafront 食野, 佢仲請我食糖水, 真係多謝晒喇. 原本諗住食完野同阿鴻, max 去練環校跑, 點知佢地都唔練, 聽日先喎, 跟住我就同阿詩去洗衣房洗衫. 諗住我, 阿詩同阿禮三個人一齊洗會平 d, 點知三個人o既衫真係多, 要分兩機洗, hall one o既洗衣房都幾旺場, 淨係洗到一機, 另一機就要去 hall 2 洗. 洗完衫我就去 newhall 搵阿鴻, sam, suki, 佢地三缺一喎, 咁我就坐陣啦, 坐到咁上下, 阿 max 買埋糖水上黎, 玩到過左時間, 遲左收衫, 攪到阿詩要等喇, 仲要等乾衣, 佢仲話要熨埋衫. 跟住我都冇再返去打牌, 留o係 hall 幫佢地執証件相, 順便休息下咯, 聽朝要去洗牙. roommate 三點幾先返黎.