11 SEPTEMBER 2004 - 慈母多敗兒

晨咁早, 八點就起身就要返去傾 project, 傾之前要搬部 printer 返 hall 先. 入到間房, 唔見阿鴻, 唔見阿禮, 淨係見到有個女人訓緊. 原來傑仔尋晚都返左黎. 咁阿鴻佢地呢? 原來尋晚佢地都冇返房, 好彩 roommate 有返房, 有人看下門口... 佢地成班人去左八樓, IE 個 P 阿 roy 間房, 又話做功課, 哼~ 咪又係玩~

之後就去傾 project, o係 library book 左間房, 真係開會咁呀~

傾到十二點半, 我就去灣仔買電腦野喇, 買左部 dvd 燒碟機, 但係一隻碟都未有. 攪到一點九, 打返屋企問阿媽食左飯未, 預期中, 未食. 一陣同家姐出去吉之島食. 咁我就大遲到, 去到食野, 食完野就開始買 d 日用品, 我個 hall 乜都冇... 家姐開始有 d 唔耐煩(平時應該係我唔耐煩先), 咁佢就返屋企先. 咁樣已經算係一個 family day 了, 對於我屋企黎講...

我同媽媽就繼續行, 要買o既野太多了, 一時間都搵唔到岩心水o既. 跟住媽媽提議去銅鑼灣o既吉之島十蚊店, 已經腳軟了... 不過又想去喎, 照去! 真係搵到要搵o既野. 跟住就順手行埋宜家傢俬, 有 d design 真係好得, 其實都係好普通o既野, 原理唔複雜, 好多人都識, 不過識應用o既就唔多. 有 d 傢俬好靚, 但係我屋企o既樓底唔夠高, 未必用到呢~ 仲有老豆唔係好鐘意我地換傢俬, 唔鐘意o既話新傢俬照樣整爛... o個度 d 傢俬真係正呀, 如果我有自己o既屋企, 成間屋都係o個 d 傢俬就好咯~ 破產...

睇到唔知時間, 九點幾都未覺得肚餓, 最後返到屋企附近先食野. 好耐冇試過咁樣行喇, 冇試過行咁多個鐘, 冇試過同阿媽行咁多個鐘.

今日o既我就好似聽日要去效野公園旅行o既小學生, 媽媽o係身邊諗得好周到好周到, 我都唔細架啦~ 佢都係唔放心我, 定係我比唔到信心佢呢? 定係放唔到手呢? 的確, 如果我自己黎, 有 d 野係一定唔會帶o既, 例如: 洗衣粉, 洗潔精. 的確又好難放心o既, 呢樣野對我, 對佢都係新鮮野, 第一次... 所謂慈母多敗兒呀~ 我唔要做敗兒!

死喇, 乜野功課都未做, 書又未溫, 希望聽日追返啦~

今日係九一一o既三週年, 撞機o既過程我仲記得... 驚心動魄.