菲律賓之旅: 後記

真係好想去旅行, 難得復活節有幾日假期, 咁就攪下去旅行啦~ 好唔容易先搵到一位團友, 佢又唔嫌貴喎~ 佢係我o既同事神爺, 工作上冇乜合作機會, 平時都好少野講, 不過難得搵到團友, 咁就一齊去啦. 對於去邊度我真係冇 idea, 佢就提議去菲律賓, 唔洗點諗, 冇乜點睇過行程o既情況下, 咁就去菲律賓啦~

首先講下個團友先~ 人就神神化化咁, 不過佢o既旅行經驗好豐富, 佢一聽完導遊提供o既匯率, 就知道啦~ 導遊開價 $1 對 5.6 賓紙, 其實當時可以做到 $1 對 6 賓紙; 我以為同佢會冇乜野講, 點知佢仲多野講過我, 好攪笑的~

呢個團呢~ 只係得十四個人, 十四個人都成團真係經典, 咁另外十二個係乜野人呢? 有兩個大陸過黎o既豪客, 好多 USD$1000 , 兩對情侶, 一對母子, 一家四口...

去菲律賓唔錯o既~ 基本上語言唔係大問題啦~ 講英文都得, 雖然我o既英文唔係好好o個隻, 但係都溝通到啦~ 而且消費指數真係低呀, 好似去 starbucks, 差唔多平 $10!!! 不過有 d 可惜o既係我o係o個度咁多餐, 都冇一餐叫做菲律賓菜, 咁多餐都係, 唔係中菜就西餐... 其實地道菲律賓菜係點架?

我o係菲律賓o既四日, 比人搜左好多次, 每當你入任何一個商場, 都會有人用金屬探測器 check 下你, 就算兩個商場連埋一齊, 都會 check 多次... 去酒店當然都會 check 啦~ 過關o個次最緊要, 連皮帶, 鞋都要除埋!!!

買完野, 想唔要膠袋? no way! 一定要用袋, 釘埋張單o係上面...

無論去買野食, 買咖啡飲都好, 佢都會問: "What's your name, sir? dine-in or take away?"

呢個團真係冇乜行程, 好多人聽完會覺得好唔抵, 但係我就幾滿意! 因為夠悠閒, 唔會好趕, 咁先係放假!

今次因為人數關係, 去唔到百勝灘, 導遊好市繪咁話, 公司唔做蝕本生意架, 人數唔夠會蝕錢, 所以想去都冇得去. 係你都唔好講出口啦!

下次再去菲律賓, 我會想去宿霧.