04 FEBUARY 2005

由於早幾個星期都返沙頭角, 已經慣左六點鐘起身. 就算尋日同今日返香港報到, 我都係六點幾起身. 雖然六日o既新年假期過左, 但係o個種氣氛都仲o係到, 起碼有 d 人仲未返工, 感覺總是冷清清的. 又可能因為我個頂頭老闆未返, 我好似少左 d 壓力.

直到現在, 我o係公司逗左 18 封利是, 成績算係咁, 我又唔係三唔識七都講"恭喜發財". 但係我好似未收到開工利是, 都唔知去左邊度, 由邊個派呢封利是我都唔知, 又或者已經收左都唔知. 入面多數都係 $10, 都有 d $20 o既. 但係入面o既銀碼都唔重要了, 依家喜歡講意頭, 最緊要係利利是是, 特別係我呢 d 運氣不佳o既人. 我同 d 同事講, 就算封利是係吉o既, 都冇所謂, 都係意頭最緊要!

最近, 我像是迷失了方向, 失去了目標, 對很多事都提不起勁. 有時間會落街跑步, 認為出一身汗會好 d. 以前滴酒不沾, 現在相信借酒能消愁, 見到酒都會想飲下, 幸好未至於沉迷酒精... 見到爸爸每日最少五罐啤酒, 真係心都寒. 早前去同事攪o既 annual dinner, 又飲啤酒又飲紅酒, 最後飲到神智不清, 最後要坐的士返屋企呢.

總會覺得上天好鐘意喜弄我, 例如話有工做, 但係人就冇乜目標... 誇張地比喻, 就像埃及車禍中, 十四歲o既小妹妹雖然逃過一劫, 但係佢o既雙親, 幼弟都死去了. 我第一個反應係: 四個一齊死可能會好 d, 淨低佢一個真係好慘的.

不過我係唔會低頭的, 老天越係要趕絕我, 我就越要堅強. 似乎 神都不太照料我, 靠自己吧.

03 FEBUARY 2006 - 冥冥中早有安排

年初三晚, 從電視得知一個在埃及旅遊的香港旅行團, 在坐車途中發生車禍, 當中有十四個人遇難.

o個晚o係人地屋企, 唔講得個"死"字, 新年流流唔吉利喎.

我第一個反應就係, 真慘情了... 第二個反應就係, 時晨到, 要上路了. 所有野都係有安排的, 呢班人客死異鄉, 都係個天安排... 凡人只可以問 蒼天何太忍 ... 又可能車禍o係你面前發生, 而你又乜事都冇. 信 神的人便會說"感謝主", 我會話:"冥冥中早有安排"

第二日, 電視就訪問一位傷者, 梁先生, 佢就咁講... "車禍之後, 有幾個香港旅遊團經過, 見到佢地, 嗌救命叫幫手, 但係無一個團肯停車留低幫手, 要三個鐘後先有當地救援人員抵達, 反而埃及人肯自願幫手,唔明香港人點解可以咁冷血......" 節錄自 newsgroup

香港人真係咁冷血嗎? 見死不救嗎? 都唔一定係錯的, 邊個話香港人熱心? 大部份香港人, 最多都係識捐錢救下, 救下災, 落手落腳就免問了. 而且大部份人都唔主動, 如果冇人肯帶頭, 真係冇人會做野的. 換轉車禍o係香港發生, 香港人最多都係會報警, 除左報警都冇乜野好做了.

埃及意外的現場, 雖然冇香港旅行團停車, 都唔代表香港人冷血嘛. 有可能有好多團友一上車就訓左覺, 唔知出面乜野事, 就算佢地想停車, 司機叔叔都唔肯啦, 領隊哥哥都唔肯啦, 遲到的話, 要揹鍋的. 埃及當地好多賊, 落左車都好危險.

仲有o個條係行車公路, 係咪真係有地方可以停車? 成班香港人落晒車又可以做乜? 佢地又唔係消防員... 真係可以搬得旭架旅遊巴? 冇受過急救訓練o既人走去救人, 係好危險的事, 真係生人都可以整死.

司機要負好大o既責任之外, 當地o既公共機構都要負責, 點解要三個鐘先有人黎救命... 真係要用三個鐘去安排?

以理智的思想去研究一個情緒激動o既人講o既野, 都係冇乜意思了, 只係有感而發.

事後中國o係埃及o既領事館o係網頁發表聲明, 叫 d 人揀車要小心, 叫師機唔好超速, 叫 d 旅客要注意安全... 都唔知想比邊個睇... 都係做場戲擺了...

繼續睇呢件事o既新聞, 真係覺得好可怕, 有好多美滿家庭就咁就冇左. 大家都識得講"珍識眼前人", 我就唔識得珍識我o既屋企人...

總之就係冥冥中早有安排...

31 JANUARY 2006

新年又到, 但係感覺越黎越淡, 睇見好多舖頭"初一啟市", 諗起d 員工就慘了.

新年有 d 野我一定會做o既, 買新衫, 新褲, 新鞋. 年初一, 二都會去拜年, 呢個係我過新年o既方式. 呢排我比較喜歡研究"關係"o既問題, 點解要研究呢? 一來我又好多親戚, 二來佢又比利是我.

最基本, 我媽有八個兄弟姐妹, 佢地 d 仔女係我表哥, 表姐, 表妹. 每個年初一我地都會去叔婆屋企, 原來叔婆係我阿媽o既阿爸o既細佬o既老婆... 而叔婆又有幾個仔女, 叔婆 d 孫仔孫女好多都做醫生的. 但係點樣稱呼叔婆o既兒孫我就唔知了...

細個o個陣, 會好著緊 d 利是錢, 越大就越冇呢種感覺, 以前會o係年初一晚拆利是, 計下收入, 到依家 d 利是放o係台面都廢時拆, 今日先知原來要o係十五之後先可以拆利是.


近幾個月識得出黎搵食, 每個月除左比幾千銀屋企, 我又冇乜野買, 又唔亂洗錢, 淨返o個 d 都盡量儲起佢(都唔儲得多), 但係儲埋 d 錢有乜用呢? 諗到呢度就... 灰了.

27 JANUARY 2006

很好, 返埋今日就有假放. 今日我都係去沙頭角返工. 到左下晝三點, d 工人全部都停晒手, 原來要跟隨習俗, 要清潔地方喎... 好誇張, 要載口罩的. 大陸人比我o既感覺點都係唔衛生咯, 仲使佢地o係年廿八清潔地方, 如廁前後都會徹底洗手...

我會覺得個廁所o既環境又唔衛生, 空氣唔流通, d 人對住個洗手盤"呻"鼻涕, 隨地吐啖呢 d 已經好唔掂, 點樣講衛生呀? 每日過關我都要填一張紙, 寫自己o既健康狀況, 乜都任我填, 有病都會話冇病, 以免自找麻煩, 不過我更加唔信佢會睇. 祖國就係咁, 門面野就做得好.

25 JANUARY 2006 - 運滯

今日約左 direct ent o既同學食團年飯, 心想場面必定十分熱鬧. 去到集合地點, 只有六個人, 我, 詩, 禮, sam, athena, cathy, 人齊了嗎? 不, max 遲 d 來. %&$#@^&%$^#$ 只有七個人...

去了一間位於銅鑼灣, 食泰國野o既地方, 叫做 simple thai, 中文就係 泰簡單. 睇見個餐牌已經驚, 真係貴, 而且份量十分的小! 最後都係食唔飽, 算了吧, 要食飽飽的話, 銀包便要捱餓.

九點之後, 呢間餐廳就會搵個女仔o係現場唱歌, 一知道佢o係泰妹, 就會懷疑佢係咪女人, 睇樣又分唔到o既...

本來諗住食完野就返屋企, 但係花市就o係隔離, 我又覺得自己運氣好差好差, 聽講行花市可能可以轉運, 咁就行下咯. 入到花市, 人就變得豪氣起黎, 見乜都想買, 首先見到以香港政治

為題o既啤牌, 咁就買左一副, 賣o個個話兩副有得平, 咁就買兩副啦, 一秒之內, 阿詩已經要左了... 但係阿禮又唔比返錢我喎... 開心就得啦, 可能有助轉運.

之後見到"五福臨門"o既牌, 又買左; 之後見到生肖公仔o既公仔, 又買左; 可能有助轉運嘛.