十一月五日 - 畢業啦~~~

畢業啦~~







未見過咁正經o既阿基:


中一o既同班同學:



不過今次主角唔係我. 今日返科大搵師弟, 莊mate 同班 direct entry (其實只係同阿 sam )影相. 睇見大家著住件袍咁開心, 我又想著埋一份, 咁就搵左阿倫借件抱著左一陣, 過過隱~~

先去火雞, 跟住去 UC, 最後去天一泉...

經 過 UC 時經過, 聞到一陣洗衣粉o既味, 呢陣洗衣粉o既味, 屋企洗衫係聞唔到的, 只有o係 hall o既洗衣房先會聞到! 突然諗起以前住 hall 同埋讀書o既時間, 自由自在的~ 真係令人十分之回味, 真係好想再過呢種生活!!! 經過 concourse, 經過去做 fyp lab o個條路, 諗起以前日日都去做 project 係幾咁辛苦, 但係比起依家返工o既辛苦同埋所受o既壓力, 原來以前o個 d 只係小兒科.

以前自由自在o個種感覺, 似乎冇乜可能再有了... 依家只好珍惜同一班o係科大識o既朋友o既感情.




好耐冇寫過日記, 最近o既生活十分之平淡, 每日都加班, 好多時都要十點九先收工, 有幾日仲要過十二點先收工, 攪到個人好煩躁... 加班最痛苦o既係成條 line 得返我一個o個陣, 感覺就好似坐監. 好想好想放低手頭上o既工作一走了之, 但係我的確做唔出... 咁我唯有死死氣地將手頭上o既工作完成... 老實講, 做o既野唔係難做, 但係瑣碎野就十分之多, 而且都幾浪費時間.

最 近我o既老細阿宏辭左職, o係佢最後一個月o既通知期, 真係好大壓力, 要 make 好多 decision, 例如安排人手, 同其他部門對話都要我負責. 期間我明白到點解佢會辭職~ 依家有新老細上場, 感覺好得多, 負o既責任好似少左. 不過呢排生意都係好, 所以都係好多野做, 想停低都冇時間...

泰好了．後記

第一次去旅行o既關係, 我見乜買乜, 帶左四千幾蚊過去, 最後仲要同阿基借錢... 個個問我用左幾多錢, 我話四千幾, 通常都以為我講緊團費, 其實淨係講緊洗費呢~ 頭o個幾日會覺得泰國乜野都好平, 去到最尾o個日, 買首信o個陣先識得諗: 其實250 baht 一包魷魚絲, 即係五十幾蚊港紙一包, 都唔平呀! 冇所謂啦, 洗得開心就得了~!

跟團去旅行都幾辛苦, 又夜訓, 第二朝又早起... 令一樣慘o既就係要去o個 d 珠寶城, 皮具城, 擺明就想你買野... 但係, 如果自遊行的話, 又去唔到咁多地方, 又要自己 plan 行程, 我呢 d 懶人都係跟團啦.

睇返買過 d 乜野, 其實有唔少都係無聊野!!!! 其中買左唔少"香", 就好似拜神o個 d 香, 不過會有香味o既, 但係o個陣香味比煙味蓋過左... 唔掂!　

五日o既日記, 居然事隔一個月之後先打完, 真係離譜.

之後o個一個星期, 返工都係集中唔到精神, 好唔捨得泰國, 正確講係唔捨得個假期...

期待下一次旅行呢~

九月七日．泰好了５ 離開了

今日同第三日一樣, 都係比較早起身, 因為要 check out 了.

一上車已經訓左了.. 基本上今日都冇乜行程, 第一站係去帝王古廟, 好悶的!!!!!!

帝王古廟就係咁o既樣:


第二站係去買野食, 由於手頭上o既資金唔係好充足, 同埋之前都頂左 d, 所以淨係買左好少野咋~

買完手信, 就起程離開芭堤雅呢個咁靚o既地方, 返曼谷了~ 導遊話帶我地去全泰國最高o既大廈食自助餐, d 野睇落都唔錯, 不過... 我個肚唔係咁舒服, 仲有就係個冷氣壞左~~~ 真係好可惜呢. 食完野之後, 仲可以上多幾層, 睇晒成個曼谷.





日日都咁夜訓, 又早起身, 所以就殘成咁了:


導遊與我:


食又食左, 睇又睇左, 泰國之行都到左尾聲了, 去到機場, 將行李寄倉, 等左一個鐘左右, 就上飛機了... 可惡的泰航, delay 左半個鐘...

話咁快又去返機場大堂, d 行李好重~~ 所以就諗都唔諗, 坐機場快線啦~

九月六日 ．泰好了４－芭堤雅好鬼靚！

今日o既第一個活動係去珊瑚島, 由酒店坐旅遊巴出發, 落車之後再坐快艇.

感覺真係好正! 個天藍得很, 海風好舒服, d 沙又好幼.

好鬼靚：






我隻腳:


一場黎到, 當然要玩下o個度o既水上活動~ 但係我又唔敢玩降傘... 淨係玩左 海底漫步, 水上電單車...

海底漫步好鬼正, 戴個頭盔就比人拉左落水,好似有幾米深. 一個拖一個, 慢慢行, 又會有人比 d 麵包你去餵魚, 但係d 水唔係好清咯. o係水底半個鐘, 就上返水. 點解... 個頭唔濕o既?

之後去玩水上電單車, 阿基坐前面, 我好驚佢開得快呢... 跟住就去買下 d 匙扣做首信, 之前買野買得少, o係度見野就買.

話咁快又到食飯時間, 呢餐都 ok 頹呀! 一隻蝦, 一條粟米... 仲有 d 乜都唔記得左咯...

我住間酒店:


跟住返酒店, 沖個涼, 又出去行下先~~~ 都係繼續搵野買, 不過都冇乜野好買咯. 入到去"信不信由你"商場, 見到有 coffee shop, 忍唔住又飲返杯, 價錢大概係 starbucks o既一半, 大概 90 baht (即係接近 $20), 但係都唔差.

信不信由你商場:


冇幾耐, 我地又返酒店, 上旅遊巴, 目的地係泰北蜂蜜研究中心, 講咁多野都係想我買野... 跟住去食法式西餐, 賣點係飲紅酒, 唔知係咪我要求高, 呢餐都係唔多掂...

我們的另一張合照:


頭盤:


餐湯:


主菜:


甜品: (D 雪糕衰過牛奶公司!)


跟住去睇人妖 show, 入場費係 700 baht, 聽就聽過好耐, 真係睇就第一次, d 人妖真係靚到你唔信. 相對尋日o既真人 show (花費 600 baht), 人妖 show 真係起值, 起碼個舞台靚好多先啦~

導遊叫我小心 d, 話我呢 d 樣人妖最鐘意.............. 冇幾耐, 真係有人妖叫我比錢同佢影相, 真係咁多個唔叫, 係要叫我喎... 最後都係冇影到.

人妖:


之後就上做 spa, 入到去首先除衫, 沖涼, 跟住訓上張床到, 跟住有人o係你身上唔知"查" 乜野, 跟住又浸牛奶浴... 跟住又唔知"查"乜野... 結論: 冇想像中咁舒服. 因為我想做按摩多 d~

今日又完左咯, 聽日就 last day 啦.

九月五日．泰好了３ －其實曼谷都幾悶

第三日比第二日更加早起身, 因為要 check out.

今日第一站係去睇三頭神象, 都幾悶...

這就是三頭神象:


個天花板好靚:


上到最頂就係咁o既樣:


無聊自拍一張:



睇完之後就去食一間好似好出名o既餐廳食 lunch, 間野叫龍城花園酒家, 聽個名就真係掂, d 野食就真係一般.



跟住去珠寶城, 情況同尋日o既皮具城冇乜分別, 都係想我地買野, 我都係買唔落手.

之後就去老虎仔樂園, 落車冇幾耐, 有人打電話比我, 原來係阿宏 (我的 supervisor)打黎, 問我一堆工件o既下落, 真係答唔到佢咯... 但係個心就一直掛住呢件事...

同 d 泰國人一樣咁懶o既老虎:



入到去最緊要都係抱下老虎仔~ 其他節目有: 睇一隻識計數o既聰明豬, 其實都唔係好叻o者~ train 左咁耐都淨係處理到 1 至 6 o既加減乘除... 但係有樣野幾得意, 就係同佢講廣東話, 普通話或者英文都得!


原來曼谷o既行程咁就完左, 之後我地去芭堤雅, 唔知點解, 我覺得芭堤雅o既 feel 好正! 落車之後, 我地去一間叫 bale o既餐廳食野, 咁多餐我覺得呢餐最正, 唔食得辣o既我話佢 d 冬蔭公好味!



好鬼靚:





食完野之後o既行程係行夜市同埋 shopping mall, 但係都可以選擇去睇真人 show, 我又好想睇下係乜野黎o既~ 好彩同行幾位老友都一齊去, 仲有其他團友, 加埋十一個人一齊睇.

入到去見到台上有五位男遊客比五位女............................. (入面唔比影相)

之後就坐芭堤雅o既的士 (成架囚車咁) 去到一個 shopping mall, 入面又有 levis, 我又買多條...

跟住就返酒店, 呢間酒店... 感覺總係比之前o個間差 d d...

九月四日．泰好了２－邊度都有STARBUCKS

乜原來去旅行要咁早起身架? 七點幾就起身, 同平時返工差唔得遠. 第一站係食酒店早餐, 睇完 d 野都唔係好岩食, 是是但但食 d 野就算了, 杯咖啡就唔好提了.

坐旅遊巴去到湄南河, 上觀光船, 沿途經過唔知乜野廟, 唔知乜野酒店, 最後去到鄭皇廟. 上船之前, 導遊話o個頭 d 魚好有靈性, 好多人都會扔 d 麵包餵佢地, 轉頭即刻有人賣麵包比我地... 真係識賺錢.


沿途風景,點解泰國個天可以咁鬼藍?


上岸之後, 見到好多好高o既塔, 據講係幾百年前起的... 冇乜野特別感覺. 又唔覺得好靚, 由於 d 塔太高, 淨係覺得好難影.





我們的合照:


逗 留左半個鐘定一個鐘, 又上返船, 又去返碼頭. 跟住帶我地去皮具城, 入到去冇客人的, 只有一班店員, 跟住就有條友解釋點樣分靚o既鱷魚皮. 呢間野o既賣點當然係真皮, 但係真係冇乜興趣咯, d 款又唔係好靚, 價錢都唔平, 最緊要係個牌子, 只係一個不知名o既牌子, 點買得落手呢?

留左唔係好長時間, 就去食午餐, 呢餐食巴西燒烤, oh my god... 黎到泰國食燒烤, 我覺得好攪笑呢~


我o既頭盤仲攪笑:


個廁所都幾靚:


我地就係食呢間:


呢間餐隔離就係四面神, 咁我都過去拜拜神, 求乜當然就唔講得啦.

四面神的現場:


又再上車, 去到新起o既 siam paragon, siam paragon 係一個新起o既購物商場, 呢個商場o既下面係一個海洋世界, 鐘意睇魚o既黎到會好開心, 我就覺得有 d 悶...





睇 完魚之後, 就行商場, 第一件事當然要去買返條 levi's, 係人都話泰國買 levis 平架啦~ 真係平唔少喎~ 跟住就去搵 boots, 家姐叫我幫佢買面膜嘛, 呢樣野都係出名平架啦~ eva 就買左對 converse. 我地香港人真係高要求, 又要平, 又要質素高, 條線縫出左 d 又要換過對... 完來"邊度都有 starbucks", 連續行兩個商場, 都見到 starbucks, 咁當然要飲返杯啦~ 價錢同香港差唔多一樣.

之後o個個站係打邊爐, 泰式打邊爐, 食o既野主要係魚, 魚蛋, 魚麵... d 菜o既味道好鬼怪, 全部都好似莞茜咁.

最後一站係去左做泰式按摩, 講舒服又唔係好舒, 但係都唔係好差o既. 咁又一 day 啦~

九月三日．泰好了１

九月二日收工之後, 四哥陪我買旅行?, 因為九月三日起程去泰國了! 少不免都有 d 緊張, 一係我未去過旅行, 二係我咁大個人都未坐過飛機!

難得去旅行, 我選擇坐機場快線, o都一o者就冇左一百蚊了. o係機場同阿基會合, 游左兩個幾鐘, 終於登機了, 個位都幾好坐, 坐多陣, 架機開始行了, 好興奮, 但係又有 d 驚驚, 成日諗到空難... 我好似未聽過泰航有乜野大空難發生過, 點解要咁驚呢?

個飛機餐就普普通通, 空姐... 唔好提了. 飛到中途, 我隻耳仔有 d 痛, 應該係受氣壓影響吧. 話咁快就兩個幾鐘, 泰好了! 平安無事咁就到左.

飛機餐：


落左機, 第一件事當然係過關, 即刻就感受到泰國人做野有幾慢, 過完關, 就去搵行李, 搵到之後, 就同一班團友會合, 比起機場出發之前, 多左 franco 同 eva, 因為佢地自己坐國泰, 比我早一日到.

講下 d 團友先, 個團總共有廿六人, 可能因為團費比較貴同埋已經到左開學季節, 團友多數都係 d 中年人仕, 後生o既數埋都唔夠十個. 領隊姓鄧, 當然係香港人, 唔知點解, 總覺得佢比我一種泰仔o既味道. 而導遊叫做 NARA 或者 小文, 就真係一個泰國人, 佢 d 廣東話都算係 very good.

離開機場之後, 就上左架旅遊巴. 第一個景點係去燕窩專門店, 唔係淨係去睇燕窩架, 有野食架! 食完野當然想我地買手信啦, 最後大家都冇幫襯, 看鋪班人面黑黑呢~

突然話我地知有下午茶食, 都唔差~




第二個站係一個 night market, 叫做 Suan Lum Night Bazaar, 個 feel 有 d d 似女人街, 其實香港都冇呢類型o既地方... 入到去就搵野買下, 最後買左隻象, 同埋 d 磁石.

今日o既最後一個行程就係去食晚飯, 去一間叫"娥姐私房菜"o既地方食飯, 一講私房菜, 我即刻諗起樓上o個 d, 去到又唔係架喎~ 係一間餐廳來的. d 野食... 算係咁咯, 咖哩炒蟹最好味, 冬蔭公湯都唔差, 其他都冇乜特別.



食完飯就起程返酒店, 酒店是是正正咁啦~ settle down 之後, 我地四個落左去酒店樓下間七仔買野, 之後去左酒店o既酒吧飲野, 我當然要飲咖啡啦~ 我同阿基都叫左杯唔知乜野名o既咖啡, 原來係酒來的! 好難飲呀...



返到坐一陣就訓了.

16 JULY 2006

16 JULY 2006

本來計畫今日去石澳影相, 可是天公不造美, 天陰陰, 想落雨咁o既勢, 最後個活動改左去機場. johnny, francis 同埋我都有同一個想法: "天啊~ 又係機場" 千萬個唔願意下, 都係去左, 好耐之前已經比左錢.

機場都冇乜唔好, 只不過係比較遠, 其實交通係好方便的. 由東涌坐巴士入機場, 就好似坐過山車, 搖黎搖去, 搖黎搖去... 機場總係比我一種宏偉o既感覺!

model 就各花入各眼, 不過我覺得出黎影相都唔係志在影相, 當 gathering 好, 當係出街行下都好. 最近好多次都係, 影完 d 相都係冇再開黎睇.

影完相之後, 仲有第二個活動, 就係科大攝影學會o既 gathering. 事前我只知去尖沙咀食飯, 跟住以為去食韓國野, 最後呢... 係去左一個食中菜, 好似叫霸王山莊.

當日十位 ex-co 因為攝影學會而相識, 但係大家都冇乜點講影相o既野, 唔講影相, 咁又講左乜野呢? 我o既印象迷迷糊糊, 人多就係咁. 志在出黎見見面. carson 拎左一堆舊相片出黎, 入面都記載住我地 promotion period o既情況. 諗返o個段日子真係唔容易捱過呢.

聽見 francis 同 carson 比左二萬幾銀去歐洲旅行, 真係令人羨慕. 其他人要讀書o既讀書, 要搵野做又搵到野做, 聽落都唔錯. 好似係得我用咁長時間先搵到工...

傳菜叔叔幫我地影o既合照:

16 MAY 2006

真係好想好想聽日打風落雨, 乜都唔諗, 淨係會諗要是有八號風球的話就唔洗返工, 就係咁簡單. 哈~ 很自私嘛? 不過聽講機會好微, 但係我都 hope for the best.

如果冇八號風球又要返工, 咁好大機會係橫風橫雨, 希望唔好吧.


頭先上網見到個咁o既故仔, 短短的, 但係有幾有意思啊. 好似o係其他 open diary 都見過差唔多o既故仔.

從前，有一個小朋友到左個蘋果園，園主帶佢到園既入口，由入口到大屋有很多蘋果樹。
園 主話：「你由入口慢慢行去大屋，途中，任你選一個蘋果。但係條件係，你唔可以行返轉頭，而你只可以選擇一個蘋果。」於是，小朋友慢慢行，入到去見到一個又 圓又大既蘋果。但係佢覺得，之後可能會遇到個更好既蘋果，所以就冇摘到，佢一路上都遇到不少大蘋果，但係都冇摘到。因為覺得之後會遇到更好既，但係沒有一 個比第一個蘋果更好。直到佢行到大屋，結果一個蘋果都沒有摘到。

如果你遇到一個好既蘋果，就不要放棄了。因為佢可能係你遇到既最好既蘋果。

12 MAY 2006

尋日又收到媽媽o既壞消息, 第一次為呢 d 事擔心係零三年頭(o個日我準備踢波). 唔知點解, 當時冇乜特別o既感覺. 跟住都算係冇事啦.

今次再收到呢 d 消息(尋日我都有踢波), 內心十分的擔憂... 總是覺得今次係前所未有的嚴重, 總覺得事情會向壞o既方面發展. 我真係怕, 好怕.

尋日下晝真係有衝動想即刻去廣州探佢, 真係怕會有乜野事發生, 因為o個度只有佢一個人.幸好最後都冇事. 講真要去的話我都唔係好識路, 就算我真係去到, 我又可以做到乜野? 呢 d 事真煩, 煩死我了. 上帝會保佑她嘛? 算了吧, 求衪有用嘛? 祂只係保佑我唔死得.

呢幾日都訓得唔好, 夜晚訓唔著, 朝早上車又訓得唔好, 收工坐車都訓得唔係咁好... 最近左眼成日都眼眉跳, 聽講話左吉右凶, 都好似冇乜好事發生o係我身上喎? 唔通有呢份工, 就算係好好的事? 係的話, 老天對我太殘忍, 人生有三樣最重要的事, 我總共有30% 左右吧.

依家成日會覺得自己好似賣左身比公司咁, 我o既私人時間變得十分的少, 以前讀書真好, 可以任我安排時間.

06 MAY 2005

o係公司入面有位同事, 27 歲左右, 痴痴呆呆的, 終日以呃加班錢為樂, 甚至星期日都會返工, 其他人睇就會當佢係癲佬, 但係佢o既心態就係"理得你點睇", 佢睇住佢銀行戶口o既銀碼不斷咁上升就會好開心.

有時諗落會覺得佢好慘, 淨係識得諗錢, 因為佢腦海中除左錢, 就係錢, d 錢真係會多到唔知點用, 最多都係買下 d 貴野.

有 時又會有相反o既想法, 其實佢都幾開心, 工作上, 由於佢唔介意人地點睇(老細除外), 所以任何問題都唔需要去解決, 甚至跟進都廢時; 工作以外, 佢又唔會有其他(或者比較少)煩惱, 因為佢o既快樂係建基於銀碼上, 而"銀碼"呢樣野又係 under control o既 (只要每個日都返工, 平日用少 d).

相反, 我都算係一個正常人吧, 若果知道有問題的話, 無論如何都會去解決, 特別係自己有能力去解決o既問題, 咁樣會顯得自己負責任一點嘛, 哈哈~ 或者自己都知道問題不被解決的話, 它始終都存在, 到最後都要我負責任.

至於我o既快樂就建基於一 d 唔 under control, 而係互動o既事情上, 咁就會變得好糟了. 因為自己o既快樂同唔快樂竟然唔係由自己去控制!

如果我可以好似呢位同事咁都幾好, 至少可以開開心心, 唔受其他事情影響. 但係開心之餘, 我又唔想變成一個沒有情感o既人, 希望唔會有咁o既一日吧.

其實又唔需要咁極端的, 因為有好多野都可以令自己開心, 唔係淨係限死一樣嘛. 做人應該要灑脫一點才是. 例如人人都想搵十萬蚊一個月, 但係達唔到目標o既時候, 係咪應該因此而悶悶不樂呢?

05 MAY 2005 - 假期

最近覺得假期同自己有些少遠. 例如四日o既復活節假, 我老細又會叫我返多一日工, 有個短週星期六, 佢又會叫我返多一日. 雖然我唔返工佢都冇計, 但係就有一種想法就係放假都放得唔安樂. 今日開始, 終於可以連續放三日咁多! 收工之前, 真係好驚收到老細電話, 叫我今日都返工...

放假又有乜野做? 其實都係冇乜野做, 呢個時候就會得返工比較充實 (雖然係有 d 悶), 而放假o既好處只係我可以訓到十一二點. 要返工的話即係要早早起身, 我最唔鐘意o既就係呢樣.

真係好矛盾, 即係返工又唔好, 放假又唔好, 兩樣都唔好? 咁點先叫好呢? 出糧最好吧, 但係唔返工又點可以出糧呢~ 哈哈~

可能人o既思想太過複雜, 先會有呢種"又係又唔係", "十五十六" o既心態. 如果簡單 d 去諗, 只係諗: 返工要早起身而放假唔洗早起身, 又或者只係諗: 返工比較充實而放假冇野做, 咁事情就變得簡單了. 但係無論我有幾簡單, 返工同放假都不由我作主的... 不過我簡單 d o既話, 就唔會令自己悶悶不樂, 返工會好開心, 放假都可以好開心.

如果人腦可以好似電腦咁, 一係 yes, 唔係就 no, 唔係 1 就係 0... 根據一推 1100 就可以有個決定, 幾好呢.

17 APRIL 2005 - 點呢???

呢個幾星期o既心情都係唔係好穩定, 都係唔係好知點咁. 究竟呢一刻佢又諗緊乜呢? 真係難以觸摸... 有時會問自己係唔係應該放棄呢? 當然, 呢個從來都唔會係我想o既結果吧. 每當我有這個念頭時, 家姐都會鼓勵我, 叫我唔好放棄, 呢樣真係要多謝佢.

真係好矛盾呀, 我又唔想比壓力佢, 如果我比壓力佢, 佢又會好大壓力, 好辛苦, 平日o既工作已經有唔少壓力了... 我都知佢唔係一個好決斷o既人... 相反呢, 我自己就會好迷, 唔知應該點, 因為全部野都係無限期的. 會唔會最後係我真係放棄左呢? 應該不會發生吧, 這總不是我的意願, 我想我會堅持的, 哈哈~

星期六o係拍賣網見到有個二手 LCD mon 好抵買, 但係仲有兩個鐘個拍賣就會結束, 如果可以當機立斷, 即刻落 bid, 咁就得手啦~ 結果唔洗兩個鐘, 已經比人 bid 左了, 哈哈~ 心裏面第一時間出現一句"蘇州過後無艇搭". 世事就係咁有趣. 不過唔落 bid 都冇錯o既, 始終涉及五百幾銀, 係真金白銀! 真係唔洗諗就落 bid? 幸好 mon 死 mon 還在, 以後仲有大把機會.

呢排聽返"刻不容緩", d 歌詞依然咁正! 四個月前, 我都受呢首歌o既歌詞影響呢.

14 APRIL 2005

今日係公司o既"指定年假", 即係扣一日年假先可以放假. 但係老細都係唔放心沙頭角o個邊, 咁我都係要返多一日... 都算係好啦~ 依家都有三日假期, 幾驚佢叫我返埋星期一!

同平日唔同o既地方, 平日最多都係兩三架旅遊巴o既沙頭角口岸, 今日居然有七架旅遊巴! 大陸o個個關口迫滿要過關o既人, 結果比平時多用左廿幾分鐘先返到公司. 真係唔敢想像o係皇岡或者羅湖口岸過關要用多幾多時間...

今日係長假期o既第一日嘛, 多 d 人過關去玩都係正常o既, 但係 d 人經沙頭角口岸過關又會去邊呢? 以前未返呢份工之前, 都冇乜聽過沙頭角口岸呢樣野... 講返轉頭, 我都冇去過旅行, 最多都係去深圳就係去廣州, 唔係過皇崗就係過羅湖, 點知咁多呢.

本來諗住五月一日o個幾日去下旅行, 點知最後又成唔到團 =.=" 咁就攪到自己少左樣野期待 (通常都係期待週末同埋月底), 仲有些少心灰意冷呢. 真係好想去旅行, 幾時先會有咁o既機會呢? 十月? 十二月? 定係要去到下年? 定係永遠都冇咁o既機會呢? 幾時先會知呢? 我都講唔出了.


講起每日過關, 都好攪笑的, 成班人落左車之後, 就會急急腳咁去排隊過關, 有 d 人會選擇用"大陸版 e 道" 過關, 有 d 人都係鐘意人手過關. 多數情況, 都係人手過關快 d o既, 但係要睇下條隊有 d 乜野人先, 有時條隊有幾個神州客, 咁條隊就會好慢. 過得快唔快, 都好睇經驗同眼光o既~ 有一次, 見到個白頭阿叔(淨係睇背面)過關, 過左好耐都過唔到, 原來係阿叉來的! 唔怪得過咁耐都過唔到啦~

28 MARCH 2005

又有一段時間冇寫日記了. 近來的生活頗為平淡, 每天早早起床, 回家後就累得半死. 接著就越夜越精神, 第二朝就冇晒精神. 長週就會十分期待星期六的下午, 短週就會期待星期五的晚上, 期待的是一兩日屬於自己的時間.

我一直都認為, 在大公司工作, 由於制度已經很健全 (事實並非如此), 要改變是不可能的. 唔知係唔係因為呢個想法, 我依家做野, 成日都會覺得 d 野係必然o既, 應該o既. 心態上就變得懶散. 或者我個人係好霸道, 好想有能力去改變局面, 但當發覺自己冇能力時, 就只好無奈地接受. 定係應該全力以赴呢?

有位同事比我o既感覺係對工作十分之熱情, 做事好認真. 佢同我講 " d 野唔係一定要係咁, 你o係度就係要改變" (大概係咁講). 仲有佢唔止一次話我個人欠缺 passion (激情), 佢話 passion 係戀愛的其中一個原素. 可能就係因為欠缺呢種 passion, 就攪到我一事無成了. 係咪呢?

我個人都係太過拘緊, 太注重程序, 形式. 記住呢樣野, 或者有機會改過來吧.

在公司裏面, 接觸其他大學的大學生. 就覺得自己不太像大學生. 我心目中的大學生是對時事十分關心, 對每一件事都有獨特的見解, 很喜歡看書, 例如是一些科學家, 哲學家的著作... 以這堆假設作定義的話, 我就不是一個大學生了. 在公司接觸其他科大的畢業生(包括自己), 都會"識少少扮代表", 唔知係唔係巧合呢, 哈哈~

上個星期六同家姐出街, 見到有對鞋想買 (因為想買鞋先會去睇鞋), 價錢都唔算貴, 四百大元, 理論上我應該好豪氣咁買左佢, 但係最後都冇買到... 事實上, 二月買o個對新鞋都好少著, 再買多一對係不必要的. 另一方面, 曾經有人同我講, 話覺得我好大洗, 好浪費. 我很在乎這個人對我的睇法, 或者話尊重佢o既意見吧. 離開鞋舖以後, 我問家姐點解我會變得咁"姑寒"? 可能我想儲多 d 錢, 快 d 儲到廿萬就好了.

前個星期日同幾位莊 mate 去影人像, 影o既地方係一間就快拆o既中學校舍, 如果夜晚入去一定會好驚. 由頭到尾, 幾乎冇影過 model 燦爛o既笑容, 今次o既主題應該係 "sad" 了. 好耐冇影相, 冇晒 sense 了.

全輯相片