對泰國的餘情未了

對泰國的餘情未了

再一次向泰國出發之後, 成日都會想食下泰菜. 前前後後我食左三次泰菜了, 以前送到埋口都唔會想食o既野, 依家竟然會有咁熱切o既追求! 真係奇妙.

第一次再接觸泰菜係o係觀塘瑞和街市政大廈入面o既, 點解會識去呢個地方? 因為<新假期> 有介紹囉, 我一見到新假期講泰菜, 就即刻買左黎睇...

當日天氣十分之悶熱, 家姐, 姐夫同埋我三個人入到去, 除左熱, 就係濕 (因為係咁流汗). 去得街市熟食中心, 對環境都唔會有乜野期望啦. 其實咁樣仲有泰國o既味道啦~~

呢間野真係泰國人開的, 幫我地寫單o既老闆娘一邊聽我地講野, 一邊寫泰文; 而鋪頭裏面, 有張泰皇o既相.


講返 d 野食先:

冬蔭公湯, 又唔係好辣, 蕃茄o既酸味比較重, 味道好濃, 好味!


咖哩炒蟹, 招牌菜, 只係 $88, d 咖哩好好味, 如果叫多碗白飯就 very good 了~~!


菠蘿炒飯, 味道好, 而且炒得好乾身


龍眼冰


馬拉盞炒通菜, 好好味, 不過都幾辣


蝦餅, 好大件呀!!!


本來我地仲叫左春卷, 但係我地食唔落啦, 咁就問佢整左未, 老闆娘話未, 真係好人啦, 咁都比我地取消! 埋單都係二百幾蚊, 算係抵啦~ 呢間野真係值得再去! 不過最好等天氣冇咁熱先

.





第二次再接觸泰菜係去左銅鑼灣一間食泰菜o既地方, 今次同四哥兩條友, 大家身上都冇乜錢, 加埋得三百蚊左右, 想去 ATM "禁"錢, 又多人喎... 我地拎起本 menu, 叫野食o個陣要計住

計住, 唔夠錢比好瘀的!

首先黎過青咖哩蝦再加麵包




黎多個炒飯


再加碟菜


拼盤



兩個人埋單二百幾蚊, d 野食細碟左 d, 味道都 ok~ 最唔好o既係 d 燒豬頸食落好漏.




第三次係去o係北角o既泰式茶餐廳食飯, 今次同家姐兩個人食, 我淨係記得佢個招牌菜 - 咖哩軟殼蟹脆包 好鬼鹹

再一次向泰國出發 - 後記

距離上次唔夠一個月, 我又去旅行啦~ 今次唔係跟團, 係同科大o既同學仔去泰國做自由人. 去四日三夜, 頭兩日去曼谷, 跟住o個兩日就去芭提雅.

雖然出發之前, 已經寫好晒行程, 但係都跟唔足, 首先, 我地都預唔到 d 時間, 仲有就係我地唔熟地頭, 好似話我地計劃中午先去珊瑚島, 去到先知原來下晝係冇船去. 本來 plan 左第一日o既午餐係食水門雞飯, 結果我地o個日都冇食 lunch...

今次自由行先知道, 原來曼谷o既鐵路真係好方便, 好多旅行社o既旅遊景點其實好近地鐵站, 甚至o係正地鐵站隔離.

上次跟團去泰國, 比我o既感覺只係趕頭趕命, 仲有去埋好多購物景點, 例如去皮具城, 珠寶城... 今次就冇呢 d 野, 時間自己預, 唔洗就住時間. 感覺好鬼 free!!!

去到好多野賣o既翟道翟, 我都冇買到 d 乜野, 因為今次有經驗, 唔會亂咁買野. 上一次見乜都想買, 買完返去都冇用o既...

泰國真係一個好地方, 去完可以再去, 去多幾次都唔會悶!

四月三十日 - 再一次向泰國出發 - Day 4

第四日, 一起身個天落住雨, 都唔會影響我地出海o既計劃! 雖然o個一刻我比較想訓覺. 六點幾咋, 真係未訓醒, 但係都要起身, 食過早餐, 就坐兩排車去到海灘, 坐快艇去珊瑚島.

去珊瑚島之前, 先去玩跳傘, 同上次一樣, 我都係唔敢玩... 真係可惜啦.



去到珊瑚島, 個天同上次一樣咁藍, 水一樣咁清.







由於我隻腳有傷, 咁我諗住乜都唔玩啦, 但係見佢地玩香蕉船咁開心, 我又想玩, 咁就去啦~ 著左救生衣, 上船, 跟住開船啦~ 原來好驚的, 開得好快, 真係嗌左出黎!!!

出發啦~~


島上面o既燒海鮮, 同上次一樣, 都係得個睇字, 下次再去的話我一定要試!!!




剩低o既時間, 周圍影下相, 想影沙灘 feel:





o係珊瑚島過左一個快樂o既上午, 我地又坐船過返對面海, 又坐兩排車, 返酒店沖涼, 時間好緊迫, 八個人都要沖身, 但係得一個廁所, 每人限時十分鐘. 點解會咁狼狽呢? 因為我地朝早怕遲左 check out, 要罰錢, 所以預先 check out 三間房.

沖完涼之後, 就坐車去機場. 四日o既泰國自由行就畫上句號了.

飛機起飛前, 因為天雨關係, 要 delay, 唔知係咪心理作用, 架飛機好似飛得唔係好穩定咁o既... 最後都安全著陸.

四月廿九日 - 再一次向泰國出發 - Day 3

第三日, 我地出發去芭提雅. 本來o既行程係去到酒店放低 d 行履, 跟住就去珊瑚島玩. 點知呢, 我地想去珊瑚島o個陣已經一點幾啦, 酒店o既服務員話, 由珊瑚島去芭提雅o既船, 最遲o係三點就開, 咁我地唯有搵 queenie o係泰國o既聯絡人 - 炳嫂. 炳嫂幾勁架, 我地去芭提雅架車都係佢幫我地安排. 講起炳嫂, 我記得上次去芭提雅有間叫"香港炳嫂"o既鋪頭, 賣手信的.

首先我地搵左間食西餐o既醫肚, 都幾貴, 不過都 ok o既.






食完野, queenie 就打比炳嫂, 炳嫂叫我地搵佢先, 佢講左幾樣野比我地知"搵兩排車" , "話去mic舊洗爽", "100 baht 先好上", 咁我地就照住佢呢三個指示, 上左兩排車, 同司機講左暗號, 最後車左我地去睇人妖show o既場地...

兩排車:



由於大家都諗住出海玩, 所以就著成咁:



跟住再打比炳嫂, 佢叫我地再搵架車上, 今次好 d, 車左我地去 mike shopping mall, 但係都搵唔到炳嫂喎, 於是又打比炳嫂, 佢叫我地比個電話門警聽, 最後點左我地去另一個 mike shopping mall. 原來 mike shopping mall 有兩間, 平時去開o個間係大o既, 新 d o既, 仲有一間好鬼殘的, 就係舊架啦. 而炳嫂o既鋪頭就o係舊 mike 附近.

好唔容易先搵到炳嫂, 咦~ 咪即係我上次去過o個間"香港炳嫂". 入到去見到佢喊緊, 發緊脾氣, 原來岩岩同佢老公, 即係炳叔鬧交. 炳叔無奈咁話"你地對佢十五分鐘, 我要對佢三十年".

同炳嫂商量過, 我地都係聽日先去珊瑚島, 今日就行下街, 夜晚食海鮮, 睇人妖 show, 最後就做 massage.

海鮮餐真係好正! 有用咸蛋炒o既魷魚, 咖哩炒蟹, 炒通菜, 燒魚...












食飽飽, o係車上面影返張相



跟住睇人妖 show, d 人妖又係好靚.





睇完 show, 我地又要搵炳嫂, 又要講o個個暗號, 搵左架兩排車, 同師機講 "mic舊洗爽", 佢做左個大o既手勢, 我地擰晒頭, 強調個"舊"字, 佢好似明咁喎, 今次就冇去錯地方了. 原來泰文o既"舊"同廣東話o既"舊"係一樣意思的.

做泰 massage, 又唔洗好大力, 但係又好舒服喎.

按摩之後, 已經兩點幾, 聽朝仲要出珊瑚島玩.


已經兩點幾啦, 終於返到我地住o既酒店:

四月廿八日 - 再一次向泰國出發 - Day 2

第二日o既行程都係圍繞住曼谷o既架空鐵路同埋地鐵, 睇返d 旅行書先知, 原來好多景點都o係呢 d 地鐵站同空鐵站附近. 好似上次去o既湄南河同今日去o既 Chatu Chak (翟道翟) 都係地鐵站附近.

翟道翟係一個跳蚤市場, 好似只有星期五六日先開, 一入到去, 地方好大好大, 有好多野賣, 就好似好多條女人街咁. 係入面行黎行去, 都係得個熱字, 都冇乜野戰利品.



行到熱, 買左 d 野飲, 我杯凍咖啡冇乜特別, cathy o個杯凍奶茶就好特別, d 顏色好古怪.



好快就到食飯時間, 佢地提議o係o個度食野, 有得揀的話我諗我唔會去o個度食. 地方都幾 dirty. d 野都幾好食o既, 黃飯, 蠔餅, 蘿蔔糕...









食完野, 繼續o係翟度翟入面行, 終於有 d 收獲, 買左三支香薰.

部份團友買左好多野, 連燈都買返去, 所以都係返酒店放低 d 野.

跟住o既行程就由我黎帶, 行程如下:
首先就係去 MBK shopping mall o既 food court (THE FIFTH FOOD AVENUE) 食野, 跟住就行 siam paragon, 買 levis, 最後就去 suan lum night bazaar

food court o既環境唔錯, 感覺幾高級, d 野係好味, 但係略嫌唔夠地道. 我地o係o個度食 pizza, 寬條麵, 馬拉盞炒通菜, 海南雞飯.







食完野, 時候都唔早, 咁就冇去 siam paragon 了, 直接去 suan lum night bazaar, 呢個市場就o係一個叫 lumphini o既地鐵站隔離. 入到地鐵站, 想買地鐵飛, 就行左去 counter 同佢講"Bat T, Lumphini", 咁佢就比左8 張飛我地啦. Bat 即係 8, T 即係位, Lumphini 就係地方.

o個度同今朝去o既翟道翟都好似, 都係跳蚤市場, 但係感覺比較整齊, 賣o既野同翟道翟冇乜分別.


呢個摩天輪上次都有影!!


行左一陣, 大家都想返酒店了, 咁就返去啦.

四月廿七日 - 再一次向泰國出發 - Day 1

第一次黎到泰國o既新機場, 大家都會話"同香港個機場好似呀". 咁香港o既機場真係好靚喎.

離開機場之前, 我地參加左個 local tour, 包車送我地返酒店, 再由酒店送我地去 grand palace, 仲有個識講普通話o既導遊~ 地方係幾靚, 但係我都冇心機影, 因為太太太熱了! 導遊話當日有 40 度. 個 local tour 完之前, 佢都要車我地去睇手信, 佢都預左我地唔買啦~ 但係都要去一去, 冇辦法. 旅行團一定係咁樣.



跟住我地就要搵野食啦, 落機之後都未食過野, o個陣已經係五六點了. 我地o既目的地係一間位於 siam square 裏面, 叫 seefah o既泰國餐廳. 都係唔識路喎, 好彩o係條街見到三個識講廣東話o既人, 咁先去到 siam square. 開頭以為 siam square 係一個商場, 去到先知原來係一個購物區.

沿途不停咁搵d 泰國人問路, 好唔容易先去到 see fah.


睇住入面 d 餐牌就頭痕了, 全部都係泰文!! 好彩有份 menu 圖文並戊, 半雞同鴨講o既情況下先落到單.



d 野食麻麻地啦, 價錢都唔算平. 或者要接受現實, 泰國o既消費指數唔算低, 想搵平野唔係去泰國.

食完野我地去左附近一個叫 MBK o既商場買手信, MBK 都幾殘下, 有 d 似葵涌廣場.



跟住就去 Big C Shopping mall, 我地主要想行超級市場, 點解飛到去泰國都想行超市呢? 或者貪佢夠大啦.

去 Big C 途中, 經過四面神像, 又經過巴西燒烤, 都係上次去過o既地方.



離開 Big C, 想行返酒店, 落雨喎~ 等極都唔停雨, 最後我地決定做乘客, 撘的士. 其實 Big C 同我地o既酒店好近, 司機梗係知啦, 咁就唔肯用咪錶, 開價 100 baht, 我地當然受價.