原來已經有一個月冇寫過日記. 返工真係令我身心疲累, 通常都係八點幾九點先放工, 返到屋企自然乜都唔想做. 但係又唔想咁早訓覺, 因為覺得太過浪費. 每日都想五點幾收工, 快 d 到短週星期六, 但係到短週o個個星期五, 先知道星期六有野做, 要返工. 雖然有 OT, 但係有得揀我寧願休息. 呢段時間做o既工作都係大同小異, 但係每次做到悶o既時候都會有 d 新o既問題, 跟住就會有新o既解決方法, 呢 d 都算係從工作搵到o既樂趣.
我開頭懷疑係咪淨係我份工先咁恐怖, 跟住發現原來冇邊個份工係唔恐怖o既, 幾乎份份工都係狂 OT 的!
呢一個月有兩件比較特別o既事情:
第一係我個 supervisor 叫我寫 report, 交代呢段時間學到o既野, 跟手對住經理做埋presentation. 一講到 report 就諗起用 word 打o個 d report, 但係呢度 d 人鐘意用 powerpoint 打 report, 可能諗住方便做埋 presentation. 為左呢個 report 真係攪到我冇覺好訓, 十二點幾訓覺, 五點都未到就起身打 report... 呢 d 事對科大學生黎講應該係雞毛蒜皮, 何足掛齒? 而 presentation 最後就無疾而終, 冇左件事.
第二就係一個畢業禮, 畢業禮o係十一月九日舉行. 當日未到九點我已經返到學校 (以前覺得九點好早, 依家覺得可以九點先返去係好幸福o既事). 第一件事就係去 University Center 影班相, 之後就周圍影下相, 到下晝同屋企人影左一陣相, 跟住就去畢業禮. 畢業禮一開始就係奏國歌, 唔知點解聽到國歌會有一種好特別o既感覺?_? 最記得當日天氣十分悶熱, 要著恤衫, 跟住仲要著畢業袍, 坐o係 atrium 就好似焗 sauna.
大學o既畢業禮同 IVE 唔同o既就係 每一個人都要上台, 每次要上台, 我最驚就係上台仆親, 好彩整個過程都順利, 由上台到落台o既時間真係好短, 用"快過打針" 黎形容就最貼切. 夜晚約左一大班親友(總共有 19 人)去食飯, 但當晚o既主角大概都唔係我, 而係我媽... 但係最後由我埋單, 呢日真係大出血, 首先請無薪假, 再加埋飯局... 一世人一次, 冇所謂啦.
之後o個個星期日, 再之後o個個星期六, 都係因為畢業禮, 所以返左學校影相, 我就真係超級眼訓, 有得揀寧願訓覺, 但係今次唔去, 第日都冇乜呢 d 機會啦~
Tuesday, November 22, 2005
Subscribe to:
Comments (Atom)