29 JULY 2005

今日去葵興見工, 時間真係預到岩岩好, 好彩冇遲到... 不過遲到都冇人知啦~個 reception 唔會記住你幾時到架嘛~ 填完 form, 苦等四十分鐘, 終於有人黎招呼我! 自我介紹都免啦~ 淨係講 fyp, 由頭到尾, 佢問o既都關 fyp 事. 佢話有 second in, 奇怪喇, 通常都係 first in 見 HR 架嘛~ 佢又唔係 HR 黎架喎... 是但啦~

跟住去深水PO 做敗家仔, 買鏡頭...

返屋企之前再睇多次醫生先~ 今次去私家診所! 搵工都要搵份有 medical scheme o既先得~ 呢間診所裝修到成間屋咁, 仲靚過我屋企~ 個醫生好有心呀! 好過 "正苦" 醫生好多! 我個肚唔舒服, 上次o個個求奇"咁" 下就算, 呢個好認真! 結論係乜? 十二指腸發炎? 即係 diu-ni-num 啦~ 睇下今次會唔會好返 d 啦~

新鏡頭影o既相:

28 JULY 2005

今日懷著緊張的心情步入科大, 去目的地途中遇見幾位相識的人, 好像人死後在陰間遇見故人.

目的地是 rm4638, 一間沒有網頁的公司, 除了名字之外, 其他我都不知道了, 不知道他們的業務, 歷史...

面識前, 首先要做 written test, 寫一封信, 幸好以前 lang 堂有留心! 勉強寫到一封出來! 據非正式估計, 同道中人應該不下四個! 幾個人排排坐, 感覺好像等見醫生.

等候半小時, 終於可以見醫生了! 醫生旁邊有一位女仕, 就像護士. 醫生要檢查我的語言系統是否有毛病, 所以首先用普通話自我介紹, 接著就是用英文... 醫生沒有下判斷, 但我覺得普通話方面有問題!

然後就問了一些普通的問題, 其中一條從未試過被問的, "你有冇諗住讀埋個 postgraduate 佢?". 我的答案顯得很有興趣, 事實呢? 不知道.

最好問了醫生一些問題, 我終於知道這個公司做甚麼了! 做空氣清新機和相關的咨詢...


面試之後, 就想著醫肚, 先到坑口的大快活, 接著到附近的商場找大家樂及美心, 美心已經沒有下午茶了... 三個地返相隔很遠, 來來回回, 最後又是返回大快活 =.="

26 JULY 2005

今日去左政府醫院睇醫生. 真係求奇到冇得助求奇! 仲衰過學校 D 獸醫! 學校 d 獸醫起碼仲可以問下問題, 一 d 關於健康上o既問題佢都會答我. 今日o個個, 連聽我講病情都唔係咁想聽. 仲衰過獸醫!

係咪公立醫院o既醫生都係咁無良? 我對上o個次睇都係咁上下. 定係我睇醫道睇得多, 搵許大夫同佢地比?

25 JULY 2005

o係柴灣 ive o個個 job fair, 我 apply 左 jos o既 engineer trainee. 今日就去做 written test 喇... 一早都知佢係做 IT 野架啦~ 佢打電話o個陣我唔知有冇聽錯, 佢話個 written test 會問 telecom. 即係點講都係唔岩我啦~

個 test 有兩份 paper, 一份係 computing, 一份就係 telecom!

computing o個份有一大堆 mc, 主要都係問 d 電腦常識, 有 hardware, 有 software, 又問 scsi o既全寫, 又有 d case study, 問個客話上唔到網, 跟住應該點... 都有問下一 d windows o既東西.

telecom 呢, 比較多 networking, 呢份有一大堆名詞, 要寫返全寫喎, 咁多名字, 我淨係記得 idd, dn, 其他都冇乜印象喇. 但係我係冇個識答的!

都唔明點解佢會叫我去做呢個 test...

24 JULY 2005

今日去左 neway ceo 同 franco 慶祝生日. o個度環境真係唔錯! 房入面聞唔到o個陣難聞o既煙味, 地方又夠大. 雖然大家黎到唔係主力食佢o既自助餐, 但係佢 d 食物都算有水準! 應該好過 d cheap cheap buffet. 最後埋單一百四十, 平過一個意粉屋o既 lunch...

天叔不停話未搵到工唔洗急, 最緊要真係鐘意做. 點解佢會講得出呢? 因為當年佢搵到十月中先返工! 不過佢係六月尾畢業的. 其實我係唔洗急的, 但係我真係有 d 急啦喎~

22 JULY 2005

今日約左幾個中學時要好o既同學出黎食飯, 有個真係好耐冇見, 差唔多有兩年啦~ 例牌約舊同學出黎唔食 cheap 野, 今次就去左金百利搵食, 都係貴夾唔飽, 勝在坐得耐. 食完之後就繼續搵野食, 最後去左食糖水, 呢間鋪同滿記冇乜分別, 出名o既有楊枝金露, 榴槤飄香... 唔想又食楊枝, 咁就叫左榴槤.... 平日屋企人食榴槤我都會嗌救命, 今日走去叫... 開頭食都冇乜o既, 食下食下, 食左三分二之後, 就覺得好難食! 以後我都唔會再食!

聽返其他同學o既消息, 好似十個有八個都唔好景...

最近被一套叫"電車男"o既日劇吸引住, o係日本逢星期四晚就會播出黎, 應該好快有得 download 字幕版. 一有時間就去 d forum 睇下有得 download 未~ 一個星期播一集, 真係等到頸都長, 如果遲 d 先發現, 一次過 bt 晒就好喇.

21 JULY 2005

話說星期一朝早九點 send 左一封 application letter, 兩個鐘頭之後, 間公司就打左比我, 叫我去 interview, 係 group interview, 呢間公司真係有效率, 果然係做 quality 的!

我真係唔係咁想去, 一來係 group interview, 我會驚的, 二來我諗到佢份 written test 會係一大堆 quality 的字眼, 就怕怕了, 最後我都有去...

今日有五個人一齊見, 有我, betty, 一個科大的人, 不過早我地一年畢業的, 仲有一個 city 人, 一個港大...

首先做 written test, 英文o個條冇乜特別, 中文o個條幾特別, 問題如下:

有一個晚上, 有四隻動物想過一條窄o既獨木橋, 但係環境好黑, 好彩佢地有一支電筒, 鵝就話"我地其中兩隻拎住電筒一齊過去先, 其中一個就返黎接埋其他...直到四隻都過晒橋為止!" 鵝就要十分鐘過橋, 雞就五分鐘, 狗就兩分鐘, 兔就一分鐘... 最後佢地用左十七分鐘過河, 咁佢地過橋o既組合係點架呢? 我就諗唔到, 亂咁黎啦~

負責 interview o個個都係早我一年畢業o既師兄, 一睇就認得出佢係阿 tim o既舊 roommate, 阿維呢~ 佢就要扮唔識我地.

首先係自我介紹, 跟住問我地有冇人講得翻晒在坐咁多位o既名字, 跟住問左 d 簡單o既問題, 然後就係講返左手邊o個個人講過o既野...

跟住就係五個人合作做一 d task, city o個個最有領導才能, 先入為主o既關係, 大家會當左佢係 leader, HKU o個個女仔好似最冇建樹... 玩完之後就要講返對頭先o既意見, 最後問問題, 咁個 interview 就完左啦~

呢個 group interview 幾好玩喎~ 我以為會有 狗咬狗 o既場面...

16 JULY 2005

之前兩日都有工見, 真係得意, 一係唔黎, 一係就一齊黎.

第一份工係o係青衣見, 即係頗為刻薄o個間公司, 今次去 second in. 一早都講明, 今次會有兩個人一齊見我, 一個係 Ind'l engg manager, 一個係 training manager, IE manager 比較積極咁問我野, 另外o個個就一直都冇問我野, 到最後佢問左條好攪笑o既, "你一直都話鐘意做埋機o既工作, 咁點解你唔申請 technician o既職位呀?" 心入面我都同意佢o既講法, 但係答就當然要答得得體啦~ 全程只係用左半個鐘. 我又唔知呢個係咪一個好o既 interview, 我會覺得比較比淡.

第二份工o係九龍灣見, 係一個 testing lab, 呢間名氣好似冇咁大, 不過都唔係一間細公司呀~ 呢個係一個失敗o既 interview. 我上到去, 有一位叫李小姐o既人招呼我, 佢帶左我去一個 conference room, 比左張 form 我填, form o既右上角有個內線號碼, 叫我填完之後用埋邊部電話打比佢.

我填完之後, 就 call 左李小姐返黎, 德國公司係唔同 d, 電話都係 siemens. 李小姐返黎之後, 我又話我想o係 working experience 上面加 d 補充, 佢話其實唔需要, 但係佢都比時間我加, 之後佢又走左. 填完之後我又去埋邊部電話打比佢, 佢又返黎喇. 咦~ 張 form 呢? 死啦, 留左o係部電話隔離! 好唔好意思地佢幫我行過去拎返... 跟住李小姐就開始 interview, 呢個時候先心知不妙, 由打電話叫我去 interview, 比張 form 我填, 到 interview, 都係同一個人! interview 途中, 我覺得我o既英文對答唔係咁好, 所以 second in 應該都無望.

跟住就返去做 project, 我對呢樣野越黎越冇心機, 開始覺得自己做多左, 我認為繼續去改善都唔會影響個結果, 而且冇錢收, 冇勤工獎, 做黎做乜?

12 JULY 2005

尋晚訓之前食到好飽, 聽講食到飽飽去訓覺會發惡夢. 點知我真係發左個夢.

個夢都幾短: 係我一邊講電話, 講講下發覺架貨船開左 (呢個時候我先知自己o係架船上面). 一邊諗點解頭先唔落船, 直到架船開左o既時候, 點解我唔跳船... (同現實相似, 好鐘意事後先問:"點解頭先...")

講乜都假, 架船駛到好遠. o係船上面見到阿姨, 佢話架船去印度, 船上面仲有好多阿叉. 擔心都冇用, 訓下覺先啦~ 個夢就完左喇.

如果用佛洛依德o既理論去解, 呢個夢有乜意思?


屋企o既新電視一時睇到一時睇唔到, 今日佢地就叫左兩個 technician 上黎, 我見佢地手上拎住一個新o既解碼器, 我諗住佢地都係換個解碼器就算, 點知唔係咁o既, 佢地走去 check 下 d 訊號, 結論係依家收到o既訊號係 marginal, 收到同收唔到之間, 所以就會一時睇到一時睇唔到喇. 最後佢地做左少少手腳, 咁就攪掂.

08 JULY 2005

四哥前排幫我 send 左我份 resume 去一間人事顧問公司, 星期五我就上左去 interview. 第一件事就自我介紹, 用英文, 咁我由學歷講到課外活動... 跟住佢就問我除左讀書之後有乜課外活動... 跟住佢就問我點解人工寫呢個 range, 我就話好多人都係呢個價錢, 跟住佢就問左 d 唔係咁合理o既問題: "問我覺得自己有乜野可以貢獻到, 而去拎呢個人工..." 我都答得好求奇. 最後佢就話會介紹一 d merchandise o既工比我, 人工都相當之低. 由上到去到返落黎, 全程都係廿分鐘.

返屋企再 check 下佢究竟有乜野工, 可惡, 一份 engineering o既工都冇... 浪費我o既時間呀~

05 JULY 2005

今日 eric 又去見工, 咁我趁機放下假, 唔返去做 project. 長命功夫o棄住做~

都冇返學校, 順理成章都唔會返去跆拳. 唔做運動又唔得, 咁就落左街跑步. 跑跑下突然o係度諗返中班o既生活係點架呢... 返中班即係返下晝一點至九點. 諗落又唔錯, 我又可以繼續夜 d 訓, 但係就一定返唔到跆拳同埋一定冇機會工餘進修. 雖然工作性質就係頹, 做 testing 的. 不過都會有身為一個工程師應該識o既野可以學到. quality standard 呢家野以前o係 IVE 讀過下, 入到科大就隻字不提. 其實可以一試o既...

依家o既大學教育比人批評係職訓, 如果當大學o既教育係職訓, 佢真係攪得唔係咁好. 但係大學唔攪職訓, 剩係讀文學, 訓練人格, 咁呢班人畢左業又可以做乜?

媽死人都要買禮物比家姐, 而且死都要買加菲貓. 咁大過人咯, 岩岩大過譚校長, 仲買公仔比佢真係得啖笑. 不過我都有份買 d 加菲貓o既產品比佢.

04 JULY 2005

今朝又去玩 interview, 今日o既目的地係青衣. 罕有地星期六收到電話叫我 interview, 即係呢間野星期六都要返啦, 想搵五日工真係談可容易! 之前o個晚我真係有 rehersal, 未試過咁認真去準備 interview. 好耐冇呢種"想"o既慾望.

franco 岩岩入左呢間野, 不過未返工... 事前我當然係咁打去叫佢教路啦~ 佢就話佢飛的士去o個間公司的. 咁我又想有樣學樣, 點知... 的士站有一條人龍, 而隔離就有架小巴, 唔洗排隊. 好容易就去到喇.

由去到間公司, 直到 interview 完, 幾乎用左三個鐘! 去到首先要做 written test, 由於有franco指點, 我已經o係屋企作定篇文, 可惜最後都係用唔著, 我份 written test 有四條題目, 而 franco o個份只係得一條... 做完 written test, 跟住就計數, 跟住就係等.

等左唔知幾耐, 終於有得 in 喇. 第一次對住 HR o既人interview, 同之前o個 d 分別好大, HR o既人知o既野比較 general, 而且鐘意 quote 返你之前講過o既野, 捉你字失! 我覺得今次interview 比前幾個好. 最後佢講到人工喇, 真是他媽的, 我都已經寫得低, 但係都要壓... 而且其他待遇都唔係咁好, 呢個 post 只係好在 行 A 計劃...

02 JULY 2005

七一, 冇乜人會提今日係香港回歸紀念日, 或者係香港特別行政區成立的日子. 而我就將焦點放o係七一大遊行. 前兩年都以"倒董" 作為主題, 有 d 偏右o既政黨就以呢一點煽動一大堆無知o既市民上街, 咁就成功地攪出一個"五十萬人上街示威".

不過今年已經冇左一個"公敵" 可以令大家上街示威, "倒曾"又如何? 岩岩上任, 未有藉口去倒, 都唔知有冇需要去倒. 最後就攪到得二萬人 (官方公佈) 上街喇... 而一堆訴求都係頗為多餘的, 最正常o既就係爭取普選 (爭取到又如何? 香港人都係隨波逐流, 都係會受人唆擺), 又有 d 話關注同性戀, 關注賓賓, 設立最低工資...

對香港市民黎講, 參與政治的方法主要有兩個, 一就係做選民, 二就係上街示威或者係遊行. 不過香港都係比較適合談經濟.

講咁耐其實我今年係冇去的, 理由就係之前一齊去遊街o個 d 人全部都唔得閒, 仲有就係落雨, 攪到我唔想去.

d 人唔去遊行, 就走左黎太古城中心睇恐龍展. 都係好奇心吧, 恐龍骨有乜咁好睇... 想入去都唔容易, 要排隊的...
呢個就係排隊o既情況: