29 JUNE 2005

今日做 project 淨係做左一個上晝, 下晝o既時間就係等夠鐘去踢波. 兩個幾鐘有乜野好做? 最後去左library 搵套戲黎睇, 咁就搵左 <十面埋伏> 黎睇, 呢套戲都好出名下. 我就真係好少睇戲, 對我黎講邊套戲都係咁新鮮.

跟住就去左踢波, 今次同 ive d 師弟, 仲有師弟o既師弟, 睇打扮, 就知道o個度o既學生質素一年不如一年. 真係天公造美, 踢左兩個鐘先開始落雨.

諗起呢 d 咁奸o既 fyp supervisor, 真係等天收佢算咯... 我知道點樣做都唔會滿足到佢o既要求, 倒不如做一間"有限公司"算喇.

28 JUNE 2005

九點要去到一間代理名牌汽車o既公司做 written test. 唔知點解住佢個招牌, 我會有一種對佢死心塌地o既感覺.

written test 分兩部份, 中文同英文, 題目都係關於時事的, 我寫左一版多 d o既時候, d 人已經寫到第二頁... 個 HR 話呢關之後仲有幾關, 要見 HR o既 manager, 跟住係 HR o既 director, 最後係做野o個個 dept o既 director. 淨係想講: 出一萬蚊呢個價錢竟然有咁多要求... 我尋日 in o個間都唔只呢個價錢啦~ 真係搵返 d 冇咁麻煩o既自喇, 大公司都係第日先諗!

跟住就返學校做 project, 個老細有 d 唔係咁合理o既要求, 自己對電子冇乜認識, 但係就意見多多, 呢 d 就係 pernanent head damage (PhD)了...

放學撘車同一個 PhD student 一齊, 相比之下, 我留多個幾月真係小事一樁, 佢起碼要到 2007 先畢業! 點頂呀... 我唔得咯. 佢仲話老細加新要求係好正常o既東西來的. 個 grade 又唔係好得好緊要, 眼見好多人交o棄貨都有 b+, 咁我寧願要 b+ 算咯.

學下"退而求其次", 乜都會變得簡單.

七一就快到, 今次又去唔去遊下街呢?

27 JUNE 2005

今朝去一間名都唔肯講o既公司玩 group interview. 一個 group 本來有三個人, 但係有一個放左飛機, 咁就得我同英傑兩個人. 呢間唔係細公司, 只不過係低調左 d, 不過又係要 stay o既! 人工應該唔低! 講乜都假, 請先算啦.

我個 fyp 真係現實世界o既寫照, 衰人滿天下, 個 supervisor 真係好奸, 以 grade 相逼, 要我地做多 d 野, 提出左一 d 無理要求, eric 可能冇同佢理論啦... 呢個 supervisor 對電子野冇乜認識, 但係就意見多多... 鬼唔望佢出街比車撞, 打雷打中佢. eric o既耐性就真係令我佩服.

下晝就去 maersk 做 aptitude test, 我都冇乜意思入呢間啦, 好難入的~ 不過免費試下呢d 東西都有數o既~

24 JUNE 2005

星期一
開始, 用新o既方法 send application letter, 希望"皇天不負有心人" 啦!

星期二,
eric 一連收到兩個電話, 約佢聽日同後日 interview... 佢顯得受寵若驚. 點解我 send o個間佢又 send o個間, 而佢有我又冇呢? 我大概都知到點解, 返屋企同家姐研究一下, 都覺得係人工o既問題. 咁之後我知點 send 啦. 但係都有一間公司叫我星期五下晝去 interview 喎.

星期三
晨咁早起身, 著到是是正正, 同幾個 direct ent 去左勞工處o既 job fair. 似乎大家想搵o既野唔係好同, 佢地有 d 有轉行o既意思, o係o個度我淨係 apply 左一份飛機工程, 一份 m 字頭o既物流公司. 好多公司都係見慣見熟. 阿詩 apply 左 BV, 我成日都覺得 intertek 好d, 起碼人工會高 1k. 總括今日係多餘的!

星期四
同英傑去第二個 job fair, 今次去柴灣 ive o個個, 同 hi dip 爭飯食呀! 今次就有 d 用啦~ 雖然好多又係見慣見熟, 但係都有 d 真係未見過喎! apply 左 jos, 力勁. 去到力勁個 booth, 佢想介紹力勁之際, 我即刻話"我知力勁係乜!", 最後佢問我叫乜野名 ?_? 有間叫 sas, 我想填架啦~ 但係要我填埋幾高幾重, 爸媽家姐叫乜野名都要填, 我最後都係冇填, 我覺得寫得太多野了...

見到 eddie chan (一個以前話我英文唔好, 想讀 city 好 "mun" 水o既串 sir), 佢就問: "畢業啦~ 乜野分數呀? 唔... 介唔介意講呀?" (即係睇死我唔掂當, 要問我介唔介意). (我諗左一陣, 唔知點講 d 大過 4 o既 cga 比佢聽)跟住就話: "second up 啦~冇 first hon 架啦" , 佢話"哦... 唔好咁講..."

跟住去到 dept 門口, 見返好多阿 sir 呀!

直到夜晚七點, 我收到三個電話叫我去 interview, 兩份係星期一, 一份係聽日! 即係聽日要 in 兩份, 我再開返聽日要 in o個份, 頂! 原來係長註的! 我之前睇漏左, 唔係我都唔會 apply 啦~ 不過聽日下晝o個份都有 d 興趣, 咁朝早去試下乜野叫 interview 咯.

我都唔知點準備咯~ 聽日佢問乜我答乜咯... 想早 d 訓, 最後都係唔得, 而且訓唔著...

星期五
未出門口, 本來約我星期一下晝o個一間, 想我今日去喎~ 我話五六點先得, 佢話"咁你得閒就上黎啦"

第一份叫 sml, 公司o係火炭. 要 stay o既, 好就好在係行 scheme A 的! 不過我唔會做, 但係我都會認真去 in. 早左三個字去到, 第一件事係做 test, 好似考試咁, 首先畫下 一個 industrial engineer o係 一個 organization 入面o既角色. 跟住係 case study, 最後有 d scheduling o既問題... 去到 in 喇, 我又唔緊張喎~ 最無奈就係比佢話我 d 普通話普通... 之後佢都係介紹佢間公司, 幾好環境架~ o係大陸成個山莊都係佢地的, 有 scheme A 玩, 佢就會係我o既 supervisor. 佢有好多沙紙, 幾個 master.... 仲有一堆唔知乜野黎, 仲有係 six sigma o既黑帶.

佢都有問我下晝 in 乜野, 我直言我對下晝o個兩份比呢份更有興趣! 當我講完我識用 minitab, autocad, 試過下 mechanical design, 學過下 production management, 學過 doe, 佢表現得對我好有興趣. 何出此言? 佢話:"你自己o既個人決定黎o既, 我地係大公司黎架, 而且又行 scheme A, 唔係好多公司比到你架咋, 仲有你想 apply 晒五年黎過o既野, 呢份工一定可以". 但係 stay 呢樣野我真係冇乜心理準備, 我唔想之餘, 媽都唔想.

最後佢仲比左 d 個人建議我, 話應該做多幾年野先去讀 master 喎.呢個就係第一份 interview.


先點幾鐘, 去沙田, 搵野食, 跟住聽家姐o既建議去旺角先(有火車站嘛), 去旺角 in 我比較有興趣o個份 project eng. 呢間野真係易話為, 我話五六點又得, 三點去亦得... 但係呢間 in 得好o棄, eric 話有個 engineer 黎招乎佢, 但係in 我o個個係 business 方面o既人, 佢話 engineer 唔得閒喎, in 得都好 o棄, 佢介紹佢間公司, 之後到我介紹下自己, 跟住就係我問問題o既時間.... 我問得多過佢! 痴線的, 令我大為失望呀!

跟住就去葵涌o個頭, 間野難搵到死, 我預早左半個鐘到, 最竟然用左七個字以上喎... 呢份工叫 service eng, 間公司做 dvd 生產線o既. 我本來都有 d 興趣架啦~ 但係佢話要學下點用部機, 第日要識拆機, 裝機... 痴線的!

今日就係咁, 一日去三個 interview......

20 JUNE 2005

今日去西貢影相, 唔知點解去坑口, 入西貢好似家常便飯, 一 d 都陌生! (我去過西貢唔係好多次)

比預算中遲左十五分鐘到, 快快搵間野食 lunch, 可能近海o既關係, 呢間野o既海鮮炒飯絕無欺場, 唔係用急凍野!

個天陰陰, 就快落雨咁o既勢, 都唔係好想影. 依家 d 人影相越黎越注重器材, 一個人帶住兩部大機出黎影都得o既.... 真係無聊.

影人都影到有 d 悶, 係時候轉返行影景了! 唔知幾時會再戰維港呢~

19 JUNE 2005

真係好! 夜晚又係去踢波. 以前都聽過維園多小偷, 今次居然偷我地 d 野! 最後佢當然事敗, 好彩有好心o既路人甲乙丙丁. 我覺得個賊仔仲好彩, 如果比我地睇到佢偷野, 佢都好難過到今日.

今日波友講左 d send 求職信o既秘技, 唔知係咪真係work 架呢... 聽落就十分之 logical...

同上個星期一樣, 食飯o個陣飲左 d 提神o既野, 夜晚都係訓唔著. 第二日都係去影相.

18 JUNE 2005

日日都做差唔多o既野, 主要時間都係用黎做 project, 有時就會留意下有乜野做, 見到像樣o既就會 send, 似乎我都唔會搵返 industrial engg o既工, 主要都係人工問題. 我都知第一份工係絕對唔應該睇人工, 但係我都幾現實. 而我覺得我o既 mobility 應該係好低, 唔會亂咁轉工. 開頭我會諗住話好想o係邊間公司做野, 又或者做乜野工; 依家已經冇左呢個概念, 有工就做啦!

send 左好多封之後, 我發覺我一直用開o個一個 template 本身有錯! 太信任 communication tutor 了... 我同家姐話"我send 左十幾封啦~ 都冇得 interview" 佢o既反應係"send 左十幾封咁少..." =.=" 一位 jupas o既同學仔(我組爸), 話多數人都搵到九千, 咁我都要搵到咁上下啦.

星期二o既跆拳又有 free-fight 玩, 結論就係我都係唔識玩, 教練講左好多野, 其中一樣係"肌肉記憶", 即係平日練得多, free-fight o個陣就用到出黎喎...

星期五係我地 set 比自己o既 deadline (之前同老細話 before saturday), 話要今日攪掂. 做到今日為止, 真係差好少好少野未做. 希望下星期內做完佢. 放下假都要. 好耐好耐冇試過o係屋企o棄足一日.

o係屋企o既時間多左, 同媽媽溝通多左, 磨擦自然就多左, 咁都還算係溝通o既~

唔知我的好同學們搵到野做未呢...

12 JUNE 2005

因為"比面" 下莊, 所以就參加左佢地o既 outing 啦~ 都幾好~ 我又可以試下部新相機. 呢個 outing 又係影 model, 影女同影相總係被混為一談. 其實我地都試過攪 齋影相o既 outing, 但係只有一個比面o既上莊 president 參加...

佢地都攪得唔錯啦~ 可以話係好過我地! 起碼佢地都算係人齊, 只有一個唔出現. 而且真係比人睇到"一條心"!

影完相之後搵左間野食 tea, size 只係比 lunch 細少少. 坐我隔離o既係一個岩岩 grad o既校友. 佢電子人出身, 但係走左去 AIA做 financial planner, 仲同我講佢o既一套"幫人"o既理念, 仲將所有野都 relate 去 sales, 咁 sell 保險就變得好正當, 好正義... 我仲比左我電話佢, 希望佢唔好走黎搵我傾計啦...

11 JUNE 2005

夜晚又去踢波, 踢完去平時去開o個間茶餐廳食野, 但係今日提早收工... 咁就去第二間啦~ 嘩! 咁貴o既, 一個普通o既常餐加凍飲, 要 $34.... 真係普通野..... 可能間野比較出名(叫翠華), 所以咁貴啦.

有一位舊同學o既舊同學叫我一定要諗好自己o既返向, 仲不停話電子業好景... 而franco 就比我一句忠告:"冇九千唔好做呀!" 佢呢排就慘情咯~ 間公司有個 job o係澳門, 佢要過去做... 工作時間長又冇錢...

10 JUNE 2005

繼續做 project... 好 groupmate 尤如一部冇cpu o既電腦, 比野佢做就做, 唔比就等人比野做...

好罕有地, 最早走o個個係我.

跟住就出左去旺角做敗家仔. 買數碼單鏡機. 拎住呢袋野真係返屋企都驚. 唔理啦~ 想買好耐啦~ 依家個價又平左咁多.

呢部機實在太好玩了!

09 JUNE 2005

做 project 時, 當有人埋頭苦幹時, 而有人埋頭苦幹地上網打發時間時, 我的感覺就係:"冇計". 這是個人對事的態度, 我還是不要干涉好了. 不過我非常討厭這種事不關己的態度, 眼不見為淨!

08 JUNE 2005

下午到 workshop 找 technician, 每一次到 workshop 都受到不太仁慈o既對待, 愛理不理的態度真令人討厭. 有事請教時, 每每都推三推四. 換轉是我, 如果我能力做到的, 我一定會去幫. 他們的良心到了那兒?

接著到自己 department 的 lab 找一個吹水成份較重(其實他對那一方面不太熟悉)的 lab tech. 他對一些事不關己的問題表現得相當之熱心, 真是令人感動! 一手拿起那塊電腦板, 一手拿著線路圖, 細心的尋找問題, 他發現的問題我一定不會發現到. 我感覺到他的心是溫暖的.

07 JUNE 2005

尋日 send 左幾封 application letter 比 communication tutor, 一改之下, 好多問題! 好彩比佢睇過先!

其他時間就做 project, 可惡的 project.

考試後第一次返跆拳, 有好多新人入左黎! 唔知幾堂之後仲有幾多會o係度呢...

有個跆拳人講佢o既一堆人生計畫, 首先係生四個 =.=" , 仲有買唔知乜野樓... 呢 d 野我全部都未諗過, 我比較短視, 未諗到咁多野.

05 JUNE 2005

依舊沉悶的星期日, 太過得閒令我十分之不自在. 以前的星期日要為一大堆功課擔心, 現在要為自己的將來擔心. 生活就是充滿擔憂.

可以做的事有: 打 winning, 寫求職信. 希望快點做完 fyp, 找到工作.

04 JUNE 2005

今日係六四, 冇乜特別感覺, 因為冇乜留意呢方面o既野.

下晝約左 alex 呢個問題少年, 教佢用佢部傻瓜機, 問題十分之多, 因為我上過攝影莊, 個個都以為我影相好勁, 仲有對相機好熟, 其實係假像黎o者. 好多人都鐘意問我有乜計一定影得靚, 我真係唔識答.

咁緊張要學用部相機係因為佢好快要去旅行喎~ 我成日都覺得佢臨急抱佛腳, 但係好聰明喎...

夜晚睇我每個星期都睇o既殘酷一叮, 我覺得今次o既表演冇咁出位, 不過可以睇足兩個鐘喎~

親友們黎到食 pizza, 人都唔係好多, 所以我決定淨係叫兩個, 咁就差 d 鬧交喇, 因為有 d 人覺得唔夠, 其實唔飽都仲有好多野食呀~ 食太飽冇益架...

03 JUNE 2005 - 失落的

做完半日 project, 食個飯, 都不忘去望下 d 跆拳人操練成點, 點知全部坐晒o係度...

夜晚去左搵 hall tutor 打 winning, 難得搵到有質素o既對手, 梗係要打多兩場啦. 之後就入房執埋 d 野走, 今次可能係最後一次見到 roommate...

走o個陣有點失落o既感覺. 夜媽媽(其實十二點都未到)孤身上路, 隻身離開科大呢一頁(其實都未走得住), 走進人生o既新一頁...

拎 住一袋可有可無o既野, 上左小巴, 一方面有放監o既感覺, 另一方面又有依依不捨o既感覺. 一來唔捨得個我間房, 話晒呢間 607 我都住左有九個月, 有一段時間我返到屋企都想快 d 返去; 二來唔捨得入面o既人, 一個係星期一至日都出席o既 roommate, 另外一個就係出席率好低o既 roommate, 仲有一個就係嘈住晒o既女 roommate... 最後唔捨得o既就係科大入面o既人(其實短期內我日日都要返去). 痴線的, 胡說八道了.

02 JUNE 2005

講左好多日搬 hall, 今日終於搬喇. 訓左八個鐘都好似唔夠咁, 可能因為間房太熱喇, 冷氣又冇晒, 但係又冇理由買冷氣咭... 又熱又焗, 又要執野, 攪到個人暈暈地...

因為阿 roy 都住太古城, 所以就搵埋佢一齊搬 hall, 最得意就係阿程想坐順風車過返港島, 所以就一齊喇. 好彩有佢, 我有八個大袋, 一箱 notes, 一部電腦, CRT monitor 加 printer, 仲有一套 suit, 皮鞋... 一個人搬點得呀, 如果唔係就要勞煩阿媽.

跟住就搵埋阿 roy, 帶埋阿程出去請佢食野啦.

返到屋企, 又熱又焗, 又要執野...

01 JUNE 2005

太過夜訓, 所以唔知醒去做 project, 醒返之後第一件事就係睇最後o個一科考成點. 好彩都 above mean! 只要份卷一出得難 d, 我就會 above mean! 依家每一科都決定我可唔可以 second up, 所以大為緊張呢~

跟住又係過住做 project o既日子... 夜晚同兩個 roommate(雖然有一個已經默默地離開左, 我都仲有兩個) 落去食糖水. seafront d 糖水真係麻麻, 不過係人都識整o既涼粉就不錯~ 同roommate 影返幾張遺照啦~ roommate 指出我唔喜歡比人影o既原因, 就係唔上鏡~ 呵呵~ 都講得岩喎~

夜晚想搵 tutor 打 winning, 又搵唔到咯~ 自己打咯...

希望個 fyp 快 d 攪掂啦~ 三個人o既心態唔同, 一個似乎想慢慢做, 但係我就想開快車!

31 MAY 2005 - "wait a minute!"

起身第一件事就係去 check 卷, 睇下錯乜都要o既. 呢科 elec001 有 mean 會有 b- 左右喎~ 我應該都係 mean 或者高少少.

下晝開始做 project, 見到工場多左一 group 人, 真係阻頭阻勢.

跟住就去燒野食, 對上一次都唔肯定係幾時咯, 應該係上年九月跆拳 soc o既 o'night.

出去買野期間發生左慘劇, 話說我自己行開左去買野, 返到黎就唔見左其他人, 而我電話又無電, 最後由坑口街市去到小巴站 (大概兩個街口的距離), 先搵到電話, 但係我又唔記得佢地 d 電話, 好彩我記得 eric 個電話, 打去先問到其他人o既電話. 可惡的, 原來成班人去左百佳, 我岩岩先由百佳出黎... 咁就企左係小巴站等左幾個字...

返到科大, 要返hall 拎野, 準備開門之際, 入面傳出"wait a minute!"... 都好有進步, 上年都係呢個情況, 冇鎖門, 今次有鎖門.

今次燒烤又係同呢班 direct ent o既同學, 我地第一次 gathering 係燒烤, 最後一次(most-likely)都係燒烤. 兩年(未有)之間, 同學之間o既關係都有改變, 有 d 熟落左, 有 d 疏離左, 又有 d o係到玩"地面式o既地下情". 有 d 死人都唔蒲頭o既今次一齊玩, 有 d 都係一樣咁離群. 以前小學, 中學, d 同學仔都唔見晒, 依家通訊更發達, 應該唔會唔知左呢班同學掛...

今日我o既手勢都幾好, 全日都冇燒"窿"野~ max 整o既甜品好有水準!

燒烤之後, 組仔阿程黎我間房宿一宵, 佢講親o既都係比較唔開心o既野. 科大的確容易令 direct ent 失落, 以前成績好好, 入到黎變左中下游..."我以前是冠軍... " 一個唔好彩拎左個 third hon, 人地一定會問以前o既 distinction 係咪呃返黎架...

阿程黎到最緊要o既事當然就係玩 winning 啦!~

30 MAY 2005

下晝返到去諗住睇 eric 做成點, 點知原來佢聽到我唔返所以就唔o係度喇 =.=" 自己做一陣之後, 就返 hall 打 essay. 拎住份 source 又唔抄得, 上網搵料又搵唔到 d 乜, 真係唔知點算. 好彩自己作下, 上網抄下, 都叫打左篇 essay 出黎, 一千五百字o既 essay...

29 MAY 2005

可怕的 final 終於完了. 都未訓返一覺好o既, 又要早起身, 去影相. 比我攪, 當然係訓覺好過影相啦, 但係影相係好耐之前約好的.

午餐去左荷里活食飯, 食階(foot court) 入面有間野去"大長今", 故名思意, 就係食韓國野, 其實只係將 d 普通野加返"韓式" o係前面. 但係我又落撘....呢間野真係唔掂, d 飯又o棄, 飲品又冇乜選擇, 最後揀左豆漿, 但係明顯係有"窿"味 o既...

影完就返屋企, 休息一下. 跟住要做o既就係寫一篇 essay, 講香港o既industrial engineering 或者 物流...