28 MAY 2005

讀到我想死o個一科 film art 有 c+! 都幾滿意! 未試過 c+ 都咁滿足. 滿足係因為讀呢科o既目的已經達到(高過 c-), 其次係以自己o係呢個 course o既表現... 有 c+ 都夠啦.

今日考最後一科! 呢一科真係可怕, 我有三日時間去準備, 三日實在太多了...

等左咁耐o既五月廿八日, 今日終於到喇, 到左又點呢? 之後我又會向第二日子進發, 當第二個日子到左, 我又會向另一個日子進發.

死等爛等終於等到四點半, 呢個 professor 真係唔話得, final 都係咁 straight forward, 想翻身應該都唔容易. 考完試之後又好似差左 d 野.

考完之後就成班同學仔出去食野, 本來話去西貢食, 跟住又去左坑口o既五十嵐, 最後又係去左西貢o既滿記, 睇住張 menu, 好多熟悉的名字, 紅豆沙, 綠豆沙, 豆腐花, 芝麻糊... 死人都唔叫呢 d "行貨"啦.

o棄返一兩日, 又要繼續做 fyp!

27 MAY 2005

溫埋今日就唔洗溫喇! 快要窒息了. 指定動作, 起身之後去 library 坐, 之後食飯, 最後去 hall o既 study room 溫書.

26 MAY 2005 - 吞逝了

九點幾, 比人嘈醒左, roommate 遲左去考試, 仲要唔知o係邊考...

訓到點幾兩點, 食個 tea 又去 library 潛水咯~ 又係潛到冇乜心機, 科大o既 library幾乎將我吞逝~ 吞逝了我的自由, 時間, 靈魂~

不過今日比尋日積極, 因為就快考啦嘛. 星期六o個科有 result 喇, 踩 mean 咋唉~ 諗住今次會好d 啦~ 點知... overall 都有 mean o既. 咁星期六o個科我要考得好 d 啦!

但係由九點返到 hall, 我都冇繼續溫書咯~

快 d 考完試啦~ 繼續咁落去會痴線的! 考完試得閒到唔知做乜都好過依家咁啦~

25 MAY 2005

訓到十二點幾, 懶懶閒好似渡緊假咁~ 攪到兩點先出去, 食完飯就去 library 溫書, 搵到一個近 lift o既位, 都幾嘈~ 溫下訓下, 都係冇乜壓力, 唔想溫呀~ 七點半左右, 搵考完三科o既 johnny 食飯, 比較下, 其實我更加似考完三科.

食飯時, 佢同佢 d 同學講 "intern", 上個 summer 之前, 我都冇乜聽過我地 d 人有 intern... 今年就開始聽到有. johnny 話有銀行 offer, 不過都要睇邊間先知做唔做喎. 跟住聽到 wendy 都有 intern 喎, 去匯豐喎~ 呢兩個都好應該請食飯啦~ 我就乜都冇喇~

返 hall 搵左阿 wind 打 winning, 由十一點幾玩到兩點, 都係打緊 winning. 之後o既時間就係睇歐冠杯決賽! 一年一次, 聽日都唔洗早起, 咁就睇啦.

只要努力, 奇蹟係可以發生o既! 利物浦半場先失三球波, 下半場十五分鐘內追平, 最後仲嬴埋場波! 令我諗起"woo la la woo~ lala woo lorlorla woo la la woo~lala woo lorlala........" 主角o既對白...

24 MAY 2005 - 10K

今日o既 elec001, 正常吧~ 應該唔洗慘死. 下晝同幾個 direct ent o既 friend 食飯. 自然談到畢業後o既事. max 話我如果第一份工叫 10 k 高左 d 喎~ 科大個 mean 係咁上下嘛~ 都係o個句, 有就好咯~ 阿鈞又話想讀 master, 佩服! 可能同我一樣, 依家都話想讀, 但係過多年幾, 可能都唔會再 apply. 詩就話要開始還債, 借左好多年 loan, 要開始還咯~

考完呢科又有考晒試o既 feel. 咁就去左深水土步, 有兩件事, 一件就係要整我張 display card, 第二件事就係買個無線門鈴返屋企, 點解呢? 要買比媽用.

原來都係普通野, 好容易就買到, 基本上全部都係一樣o既, 我都唔知咁多款有乜唔同. 有d 設計係 portable o既, 但係冇一個設計會係平安鐘(救命鐘)咁o既 size, 加埋有震, 大陸 d 野都係鐘意抄黎抄去.

買完就返屋企, 裝左去啦~ 之後都係指定動作, 訓返覺先~ 起身食完飯, 又走人咯~ 返去o棄下先, 然後又要搏殺.

返 hall 前, 去lab 整理下我o既地盤, 老細話亂喎... 去之前我開左 locker, 將一 d 早就應該消滅o既野消滅左~ 今日 physical 地消滅左佢.

23 MAY 2005 - 意志消沈

一起身收到 supervisor o既 email, 佢話我地呢組人唔係spring 畢業, summer 先畢業喎~ 呢樣野一早估到, 本來諗住考完試之後o個幾日繼續做, 做完都叫做 spring sem 畢業啦~ 誰知咁就叫 summer 畢業!

summer 畢業又如何呢? 其實都冇乜影響, 但係我就係唔服氣. 真係冇影響, 又未開始搵工, 唔似得 groupmate 咁, 懂得"善用"時間, 走去搵工, 依家有工做啦~ 仲話到時可以放左工, 星期六日返黎參與個 project 喎~ 但係印象中, 佢能力範圍以內o既部份已經完左工... @@"

太早開始溫o既關係, d 野睇過又睇, 冇乜心機溫咯, 溫到意志消沈... 科大令人真討厭~ 夜晚o既時間搵埋阿源一齊頹~ 頹到咁上下, 去左搵 hall tutor 問功課, 跟住仲玩返陣 winning 先!

22 MAY 2005 - 嚴陣以待

又係過著星期日o既指定情節. 今日唔同 d, 要溫書, 星期二有 final. 今次相當謹慎咁, 逐粒字認真睇, 好耐冇試過咁"嚴陣以待"地對待考試.

21 MAY 2005 - 快 d 完場~

今日o既 final 又好似好順利, mid-term 都係咁, 不過就 below mean.

考完試即刻就返屋企, 太過辛苦啦~ 平日都會留多陣, 不過今日都冇機打, display card 個風扇又壞左.

我同家姐講話我 send 左 application letter 冇聲氣, 再同佢講人工o個 d 野, 佢話"呢 d 工好多人爭架!". 我就唔明, 多人爭, 點解嬴o個個唔可以係我? 科大比人感覺都算係一間名牌大學吧(我就覺得虛有其表) ! 而且我唔覺得自己o既能力好低喎.

夜晚去左踢波, 好變態咁又唔輸, 又唔嬴, 輸同嬴都冇所謂, 大家都係想完場. 踢完之後, 估計踢左一個鐘頭有多!

同我呢排o既心態差唔多, 好想快 d 考完試, 結果都唔想理, 雖然都好緊要. 科大呢個鬼地方, 暫時我唔想再留o係度.

返屋企前見到有 vcd 鋪, 就入去問有冇"黃土地"(film art 要睇o既戲), 竟然有! 咁就買左返屋企比媽睇喇.

20 MAY 2005

入到去考試, 快快趣趣寫完篇文, 咁就做完份 paper o既 三分二. 仲有o既三分一就係 film analysis, 有乜吹乜, 打死罷就.

考完呢科之後, 我覺得好似已經考完試. 之後o個 d 點都冇呢科咁變態!

剩餘o既時間就準備聽日o既 final, 聽日o個科好似冇乜難度, d 野好似識晒, 加下今日咁辛苦, 都唔係好落力溫. 唔溫又點呢~ 反正係open book.

同層o既 year zero 話自己已經考完試, 我就同佢講"仲要o係度捱多三年呀你~ 哈哈".

19 MAY 2005

繼續為 film art o既考試頭痛.

professor 話明聽日要寫一篇 essay, 而題目都比左喇. 咁就要準備呢篇 essay, 又要睇 reading, 又要去睇返套電影. 辛苦呀~ 咁認真咁準備, 希望唔洗死得咁慘啦~ 最後我密密麻麻咁寫滿左三張 a4 紙, 背左入去希望唔洗死得咁慘啦唉~

不過呢 d 努力得唔到回報都好正常o既~

17 MAY 2005

今日返學校繼續努力. 坐小巴o個陣, 記起有人o係 newsgroup 話, 考完最後一日 final 坐小巴離開科大o個一刻, 好似出獄喎~

咁我依家坐緊小巴, 感覺就好似去坐監咁.

去 library 想搵一個位都難, 好彩最後都搵到~~

16 MAY 2005

今日係假期, 我都係留o係屋企溫書. d 野聽完好似冇聽過, 平時上堂唔係咁留心.

15 MAY 2005

留o係屋企溫書... 夜晚睇住電視直播o既搶包山. 覺得好好彩, 好彩在我o個頭好大雨, 而長洲o個邊冇落雨.

14 MAY 2005

今日就係 presentation o既大日子, 準備左成個星期, 就係為左呢廿分鐘. 七點幾就起身, 未到八點就上到 lab, 即係緊要關頭我都起到身o既~ 套 siut 真係著得幾舒服, 真係一分錢一分貨.

presentation 過程算順利, 不過其他 professor 睇落就唔明我講緊乜, 正常o既, 都唔係佢研究o既範疇. 最後 Q and A o既時間, 太緊張啦, 都唔知答乜.

之後去左食飯, 飯完就返 hall, 跟住就返屋企咯~

屋企o既晚飯相當之豐富, 睇住咁多野, 唔食又浪費, 食晒佢又辛苦, 一個唔覺意就食飽左.

13 MAY 2005

今日o既 elec001 遲左個半鐘入去. 哎呀~ 今個星期係 last week, 照理今日係 last day 啦喎~ 我又冇o個種感覺喎~ 大學生涯o既最後一堂都遲左, 真係可惜喇.

上完堂o個兩個鐘做左人地組o既 technical support, 幫佢地執 poster ?_? 回報係一份午餐~

跟住o既時間我都想 print poster, 但係 barn a 部 printer 唔生性. 咁就 print 唔成, 又走去 presentation 比老細睇喇, 佢話今次好好多喎~ 仲有教左我地 d 新野, 依家先教真係... 仲話有問題就 email, 真係轉死性.

跟住 print poster 都有好多意外, 攪到好夜.

返到 hall 熨衫喎~ office d 工友真係唔係路, 走左入去訓覺, 咁就借唔到 熨斗. 搵唔到佢o個刻我有衝動去投訴佢! 最後我入左佢地 o既休息室搵o個位工友. 借完熨斗之後佢暗示叫我第二朝先還, 得, 唔好阻住佢訓覺嘛...

今日唔洗五點訓, 四點幾訓, 已經心滿意足了!

12 MAY 2005

個 powerpoint 基本上都攪掂啦~ 淨返要執o既就係 poster... quality report聽日要交, 但係負責執 report o既阿詩同阿鈞忙緊自己o既 fyp poster. 我有 d 膽心佢地會做唔切, 或者係好夜先做完, 最後我自把自為, 自己執, 都唔算係好多功夫o者. 但係我執完之後, 發覺佢地都執緊, 咁就話返比佢地知有乜野一定要執算喇.

其實我唔應該對呢 d 可靠o既 groupmate 冇信心o既...

今日都係近五點先訓... 要執 poster, 又要執 resume...

11 MAY 2005

今日rehersal 比 professor 睇, 佢比左好多意見, 我地做o既同佢想要o既差好遠, 即係個 powerpoint要大改, 好彩有個好 groupmate. 仲有 professor 睇完我設計o個張 poster, 急不及待要改晒上面 d 字, 親手改喎! 真係難得.

rehersal 之後我又去 workshop 開工, 做到五點幾都冇人趕我走 (正常五點就要走), 咁就繼續做... 最後到六點幾終於比人趕.

夜晚同 johnny 去買suit, busi 人o既意見真係不錯. 成套 suit 真係好貴好貴!

10 MAY 2005

本來今日要 rehersal 比 professor 睇, 點知佢又放飛機喎... 咁都好, 聽日先啦~ 死到臨頭, professor 果然緊張左~ 可能怕我地會失禮佢.

夜晚比人叫左去打 free fight, 唔知係因為對手係我識o既人, 定係我已經冇咁緊張, 今次係笑住黎打, 攪到好似唔係好認真咁. 其實係 relax o者~~ 應該係訓得太少啦樓淨係四個幾鐘), 個人冇乜反應.

今日好少可地, 十二點前返 hall.

09 MAY 2005

一日剩係上一堂, 我都要遲到, 不如走左去算啦~ 今日 pre-presentation (即係 rehersal) 比助教睇, 講左一 d 問題出黎, 咁遲 d pre-presentation 比 professor 睇就好好多啦~

o係 lab 留到好夜呢.

08 MAY 2005 - 不孝有三

今朝起身, 見到阿媽出院啦喎~ 雖然今日係母親節, 但係我都要返學校做野, 真係對唔住啦... 真係未見過有人做 fyp 做到咁慘情, 照鏡o個陣會見到一件...

不孝有三... 一係少同媽食飯, 二係放假唔同媽食飯, 三係母親節唔同媽食飯.

我負責設計 poster, 就係因為我知呢個 poster 係計分的 (雖然可能係流o既), 所以我更加要負責, 話晒上年幫 photosoc 設計過幾次! 設計呢 d 野真係好得意, 最後整出黎o個個設計, 點睇都唔似做左成日o既成果.

鈞話用左兩日時間做o既 java 功課, 唔小心洗晒, 淨係 recover 到一個, 聽完之後除左笑, 就係笑, 真係好唔小心先做到... 幾時變到一 d 同情心都冇?

今日又係o係 lab 留過十二點先走... 呢 d 非人生活幾時先可以完? 考試都未溫過... 哈哈~ 考試o個排咪可以似返個人咯~

eric 又講 $13 k, 我都有 d 想試喎.

討厭的確係幾辛苦, 但係我繼續去討厭....

07 MAY 2005 - good?

臨急臨忙準備o既 presentation, 都唔係好差o者, 阿 sir 仲話 good, 雖然我覺得係客套話...

下晝去左整 display card, 出奇地可以即刻拎返...

跟住就去醫院. 對上次玩跆拳整親, 之後o個日我都要去. 今次都係一樣.

今晚o既"奇幻潮" 講一個有三個仔女o既阿媽患左急性腎衰竭, 就快死得, 而勾魂使者意外地早左四個鐘黎到, 但係勾魂使者話未夠鐘係唔會接佢走. 呢個故事就講呢四個鐘發生o既事. 最後一幕當然就係班細路喊住咁嗌"阿媽唔好走", 再加埋一 d 用黑白播出黎o既家庭片段, 而表達唔捨得o既情緒. 橋段就十分之行貨. 但係呢堆行貨居然攪到我眼濕濕, 有感同身受o既感覺... 最後結局當然係 happy ending.

06 MAY 2005 - "好 free-ride"

下晝繼續做 quality report, 做到七點都未做完, 我又係由得其他人繼續做, 自己走左去. 其實我都做左成個下晝啦~ 七點又係走左去跆拳, 有一種心癮, 就係唔去唔得. 越近 final, 真係越少人黎... 拎靶o個陣比人踢傷左隻手.

跟住又去 lab 繼續做, 做到十二點幾, 返 hall 繼續做到五點幾...

阿源話我呢 d 人好 free-ride... 即係好容易比人 free ride. 真的嗎? 今次都唔係比人 free ride, 大家都有心去做.

05 MAY 2005 - 走~~~~~~

第二次參加卓匯會 (同 d 成功人仕食飯), 今次我早到, 可以睇下邊台有 d 乜野 guest, 有好多專業攝影師公會o既人喎, 我決定唔坐呢幾張, 好悶的. 最後決定同六樓o既 floormate 坐埋一齊, guest 係人力資源部o既 director, 都係悶人一個. d 野又唔係咁好食, 真係多餘的.

最後問及佢 ieem o既 graduate 做乜好? 佢講下講下都係講左去 logistic, 其實 logistic 真係唔差架, 起碼唔洗返大陸. 仲有o既意見就係做大公司先喎... 佢o既意見好似有 dd 多餘喎~

之後就繼續去 lab 做 report, 由得其他 groupmate o係o個度做, 今次我都算係不負責任咯~

臨走前, lab 個門口有 d 問題, 就係 sensor 唔知佢閂埋左, 所以係咁 beep, 無論我點踢佢, 都係冇反應, 最後決定一走了之~

返到 hall, kenneth 話想食糖水, 另外o個個又話去, 咁就一齊去喇, 三個人住埋一間房, 今次只係第一次三人同台.

04 MAY 2005 - 紅花會

presentation 話咁快就過左, 我都係克服唔緊張呢個問題! 但係 miss 話唔係好覺我緊張喎, good ar~ miss 話過有些少緊張係應該o既, 但係要控制佢. 我開頭都幾討厭呢個 miss, 覺得佢專制得很, 但係上開堂又覺得教得幾好, 幾用心. 今日o既 presentation, 兩組都唔洗一個鐘, 但係比 comments 就比左成粒鐘 ?_?


下晝o既時間老奉係做 project, 五點後繼續做 quality o既 project, tempo 紙巾點試都係最好! 最好就是最好.

返 hall 去左"紅花會" 即係有紅豆沙同豆腐花喎... 豆腐花有 d 酸, 紅豆沙比較苦, 唉~ 不過拎左幾支雞精同埋幾包咖啡~

02 and 03 MAY 2005 - 怒

eric 話 PTC 請 trainee, $$$$$$$$$$13k$$$$$$$$$$ 喎~ 嘩~ 第一份工有 10 k 我已經好開心了!

聽日交 report, 今日之內要攪掂! groupmate 2 號夜晚七點已經走左人, 淨係得返我同 1 號做... 2 號呢? 寫左唔夠十頁紙, 而且頁頁都要執手尾, 錯漏百出, 唉~ 真係唔夠膽再叫佢幫手寫, 寫完又要執... 而且又冇主見, 肯定係一邊寫一邊問. 最後我同 1 號做到凌晨四點幾! 慘情在 1 號冇 hall 住... 真係一邊寫一邊鬧, 洗唔洗咁早走呀!? 理由係返去做功課... 最後份 report 唔計圖紙淨係得五十幾頁. 五點幾返到 hall, 仲要做功課, 六點半先訓~ 跟住仲要上堂.

訓到十點, 1 號話 2 號o個張野又有問題喎~ 咁我又要執頭執尾, 好彩幾個月前做過差唔多o既野o者... 又繼續做功課... 下晝又聽講話 2 號覺得我地太遲先寫report, 所以攪到咁o既田地喎... 但係我已經連續好多日做 fyp 做到夜晚, 而佢淨係負責寫 report (因為太多野唔識). 而且又寫得少, 一早寫晒係理所當然的. 下晝淨係想訓, 夜晚想去練跆拳!

夜晚就去左練跆拳, 岩岩開操就冇貨了... 唔夠訓係差一截. 自由活動時間搵左個同學仔一齊著護甲, 首先係我踢左佢唔知幾多腳, 跟住到佢踢返我, 佢o既腳頭都幾重, 少少痛得黎相當有快感!

隔離一班 dancer 一路跳, 跳得幾好睇. 我地就一路踢. 我突然o係度諗, 練極都係呢 d 舞步, 唔會悶? 其實我次次都係咁踢, 又悶唔悶?

希望第日都可以星期二五返科大練跆拳啦~

返 hall o棄到十二點, 又要準備聽日 lang o既 presentation, 又有慘劇發生! 為左保住 d 靚 o既字型, 負責 powerpoint o個位將 d powerpoint 變晒做圖, 但係我又發覺有野想改喎, 咁又要去 lab 搵返文字版喇. presentation 相當麻煩, 最緊要我都唔係好了解我要 sell o個樣野. 寫篇三分幾鐘o既台詞都難.

三唔識七o既人o既日記我都可以睇一餐, 話我唔係痴線都幾難.

好耐冇寫咁長篇o既日記.

01 MAY 2005

已經五月喇, 呢個月係我o係科大o既最後一月, 都係我 ug 生捱o既最後一個月, 應該係我o係學校o既最後一個月. 一方面我為自己就快臨開呢個地獄而開心, 但係我又捨得入面o既人.

今日都係繼續做 report.

諗起黎緊o既時間就得人驚.

五月三日要交 report, ieem223 功課
五月四日有 lang o既 presentation
五月七日有 ieem227 o既 presentation 同埋 report.
五月十四日就係 fyp presentation

30 APRIL 2005 - 七十三度

30 APRIL 2005

諗住一直唔訓, 然後去上堂, 點知到八點就捱唔住,諗住訓兩個鐘就去上堂, 點知訓多左一個鐘. 五月三日要交 fyp report, 所以諗住盡量寫, 點知寫到冇乜野好寫, 要寫o既都寫左落去. 臨訓前打返一陣機, 部機hang hang 地喎, display card o既溫度係七十三度, 又如何?

上完堂, 食個飯, 返 hall 又撞到 hall tutor, 咁又打機喇, 繼續都係 hang hang 地, 原來張 display card o既風扇壞左, 所以要處理立體o既時候就會 overheat, 跟住就冇野睇. 好彩有 onboard display card, 頂住先!

返到屋企即刻訓陣先, 跟住都唔知做乜, o棄下o棄下, 好似冇做過 d 乜.