30 JULY 2004 - 受寵若驚

一起身就打尋日o既會議記錄.
之後諗住填左張"免入息", 然後交左去. 點知呢樣又冇, o個樣又冇, 咁就算把啦~

就黎一點先返學校. 返學校途中唔知做乜, 好緊張, 為左尋日個 quiz o既 result 緊張.
真係痴痴地o既, 唔係好耐都冇為呢 d 野緊張嗎? 今日又係咁... 希望下次唔好啦.
考成點呢? 一早都知邊度岩邊度錯, 不過佢扣分都扣得好仁慈...

今日有阿禮同阿 max 陪我食飯, 三個男人都可以o係度講是講非, 真係攪笑.
大家好多時都冇講名, 不過有共識的.
講到三點幾, 佢地兩個去做 gym, 我就去 library 坐左兩個字, 之後就落 new hall 搵阿波, 搬 canon o既 souvenir.
我去到 631, 敲門, 有人話"入黎啦"... 佢個 roommate 來的!
跟住o係6 樓行黎行去... 阿波終於到了! 原來佢由 barn B 行返黎...

咁就推車仔出 atrium, 架車好大架, 推唔到入 house 1 上 brige link 部 lift 個門, 我同佢都知一陣會好麻煩...
去到火雞, 正名應該係"時間之環", 真係最近睇返最近o既<同創>先知!
首先話要soc chop 先可以搬貨走, 咁就 call 阿 tim 帶個 chop 上黎, 攪攪下又話唔洗, 阿 tim 上黎多餘的, 真係多餘, 又唔幫手搬野...

咁我同阿波就做下物流仔了.
去到 lg7, 就要行斜路去到 PG2 o個邊... 真係殺左我好過!
阿波不停叫我睇住後面, 驚 d 貨跌, 我o既想法就係跌左都冇所謂, 又唔係乜野貴重野, 所以我多數都係睇住前面.

最後終於攪掂喇. 搬晒 d野去阿波間房, 咁佢間就變左雜物房了.
搬完 souvenir 之後, 我手上有suki 份測驗卷同埋一份功課, 咁就拎埋上去啦, 使命必達.
之後就一齊溫下書, 呵呵~ 有我o係度都係溫唔到書啦~ 咁就上下網啦, 學下點玩 newsgroup 啦~

冇幾耐queenie 同阿詩黎左, 哇~ 好耐冇見阿詩咯! 之後cathy 都黎埋.
咁我就比成班女人趕左出黎... 去 common room 坐下咯~
跟住阿詩, cathy 同埋queenie 就上去class visit, 目的係游說下年o既 direct ent 玩 o'camp.
冇幾耐我地就出返 atrium, 見到源哥喎~ 打比佢地三個, 打左 N 次都冇人聽的!
咁我地三個人就去 LG5, 搵埋 sam 同 athena 食飯了. 食緊野o個陣, billy 問我幾時生日...
大家都好想我快 d 生日... 受寵若驚.

食完飯就去 LG1 搵 IEEMSS 班 ex-co, 聽 o'camp briefing session, 留o係學校唔走都係為左呢樣野!
佢地教返我地點樣跳 camp fire. 即係o個陣我覺得好白痴o個 d.
今日玩返又覺得好得意. 今日o係我隔離o既又係阿 wind, 上年 o'camp 好多時都係同佢一齊跳的.
跳到 d 步伐錯晒, 冇乜所謂啦~ 開心就得喇.
唔知點解, 跳完之後個人好似好眼訓, 集中唔到精神...

跳完就走人喇, 去到 atrium, 佢地送返份禮物比 cathy 先, 條頸鍊都幾靚的.

跟住就返屋企咯.
返到屋企先感覺到腰酸背痛! 頭先做物流太辛苦了...

29 JULY 2004 - 大頭蝦!

 
今日都幾早起身溫書, 溫到咁上下, 唔知係咪覺得時間太早, 定係覺得自己識晒, 冇乜心情溫.
唔得咁架, 都係要迫自己溫, 唔想睇都要繼續睇. 溫到咁上下, o係屋企是但食 d 野, 就返去喇.

大頭蝦! 把"遮"漏左o係地鐵唔記得拎走, 而我直至到左科大, 落左小巴先記起...
衝上去課室, 搵個位坐啦~
都唔知做乜, 好驚張. 一個 quiz 真係值得我去咁緊張? 可能想考好 d 咯.
我覺得份卷都難難地的. 考完之後佢即刻講答案, 哎呀~ 中招了!
suki 話錯唔少喎, 唔緊要, 考試努力啦!

落左堂之後, 我就去開會喇.
我都幾準時去到 LG5, 不過都係冇人, 咁我落去 LG7 食 tea 啦~ 咦~ 見到account groupmate 阿恆喎~ 咁一齊啦~ 佢話佢成日都未食過野, 就餓死啦喎~

食食下, carson 就打比我, 話好多人黎左喎~ 咁我就拎埋杯奶茶上去. 真係好多人...未到, 加埋我都係四個人. 之後金迪都黎埋.
見到佢地梗係比返 D 咭片佢地先啦~ carson 見人少少, 就提議用咭片玩 "cum 棉 toy".

玩法:
每款咭片拎幾張出黎, 洗均佢, 輪流出牌, 出牌o個陣要嗌一個莊員o既名, icq nick name 又得, 全名又得, 稱呼都得...
如果嗌o既名同咭片上相同, 就拍落去... 有 d 莊員唔在場, 我地都拎埋佢地 d 咭片出黎, 咁出左o個張點算? 見到就拍!

金迪原來唔識我地d 中文名, 係咁輸呀, 不過玩下玩下就到我係咁輸...好玩好玩~
等齊人啦~ 開會啦~ 原來話就黎要準備考試所以唔黎開會o個個莊員, 係下個星期五先考試! 好過份, 佢o既理由次次都好出位.

開完會就講起電子人... 我地幫佢地影 inauguation, 一直都冇找數, 一直都冇聲氣, 原來話我地影得唔好喎(係要聽返豪哥講先知).
呢 d 人真係連基本o既常識都冇, 夠擔上莊, 仲做埋 P... send email 比佢又唔覆. 所謂唔死都冇用就係呢 d...
即係去食飯, d 野唔好食都唔可以唔比錢架嘛. 呢度 d professor 教得唔好, 唔通又唔交學費?

跟住就返屋企咯~ 有個 miss call 喎, 原來係舊同學嚴俊樂, 打黎講星期六唱 k o個 d野.
我唔係好想去, 因為想溫書, 不過比下面啦~ 去啦~ 一邊坐小巴, 一邊講電話, 講到頭都暈, 輻射影響嗎?

返到屋企個人好 free, 好似考完試咁, 下星期先考試喎! 下星期先再 free 過啦.

頭先下晝先 quiz 完, 咁快已經改晒咯, 真係有效率...
d 人都高分得好得人驚, 唔知我考成點.

久唔久就會諗返下個sem o既時間表, 其實兩日前已經睇左.
真係想喊, 星期一二三都要返九點...
其他時間唔理住, 淨係三日返九點呢樣都已想喊!

28 JULY 2004 - 孤獨的時候就會...

起身就繼續做功課, 做到十二點, 雖然未做晒, 但係都要出門口咯.
要返去同 cathy, judy 慶祝生日喎~

好大膽的 cathy, 成班人返黎同佢慶祝生日, 佢居然唔蒲頭!
咁就同 judy 慶祝咯~
一大班人好開心, 一大班人o既開心都感染唔到我. 我都係少少自閉型的.

唔講咁多啦~ 大家都肚餓, 咁就食飯啦~ 今日上 LG5, 去金飯碗叫兩送飯, 阿鴻上次叫o既兩送飯, 點止兩送呀...
我又有樣學樣, 叫左呢個多送飯, 不過, d 飯唔多夠, d 豆腐又好似壞壞地咁. 最後都係唔夠飽.

咁就餓住咁去溫書喇~  溫之前上左四樓, 攞返份功課先啦~
跟住就開始長駐 library...

阿鴻又一齊喎~ 佢都運桔o既, 又唔係溫書o既, o係度齋坐...
阿鴻坐到四點幾就走左去游水喇, 又係我自己一個坐.
真係太靜喇, 溫到悶就會諗女人, 無端端會諗到舊愛, 真係得人驚...唔... 佢係女人來的. 咁就要即刻停, 唔好諗, 繼續溫書...孤獨的時候就會胡思亂想...

中途我訓左兩次, 對住本書, 成版都係字, 真係好眼訓. 今日library o既冷氣真係特別冷, 著埋soc jac 都仲覺得凍, 加上我肚餓呢...

悶得很的時候我會拎部 mp3 出黎聽歌, 解下悶咯.

溫到八點半, 我都係冇意志繼續溫落去喇, 咁走啦!

返屋企繼續努力啦!
都唔敢溫到太夜, 明天請早.

27 JULY 2004 - 出風頭?

今日 presentation, 一起身就返去彩排, 不過遲左幾個字...
又係去返 barn C, 都話有我o係度就好難專心做野, 實會吹水架啦~
所以攪左個幾鐘, 都淨係rehersal 左兩次咁多.
今日比尋日好, 我o係屋企有練架嘛!

o係 concourse o個陣見到舊愛拖手仔, 今次冇乜感覺, 大家微笑點頭咯. 太好了!
希望感覺會越黎越淡啦!

今日同一班 account 的 groupmate 飯, 死... 有 d dead air 喎!
我會叫大家, 講野啦講野啦~

阿恆話考完試一齊出去玩, 我真係擔心大家唔係好熟呢個問題喎.
咁快諗定考完試 d 野, 星期四仲有個 quiz 呀!

食完飯就上去聽 presentation, 今日o個 d 比尋日o個兩組好得多!

睇見人地 present, 就諗起一陣自己都要, 好緊張呀!
第一組 presentation 完比班入面o既 英俊先生 challenge, 呢個人深深不憤, 話一陣要 challenge 返佢地喎~
"英俊先生"個名真係有"英俊"二字, 所以英文名就順理成章, 直譯, 叫 handsome.
真係... 己所不欲, 勿施於人嘛! 又諗起: 本是同根生, 相煎可太急;
唉~

第一個 break, 我去左廁所, 之後就懶有性格, 諗住唔好disturb 人, o係門口等左半粒鐘..

好快就到我, 都仲係緊張, 總共 rehersal 左三次, FYP 都冇rehersal 咁多次.
真係到我, 都有些少緊張, 好彩講到野, 又冇開機關槍.
我地比人問問題喎, 佢地都係 challenge 居多.

都唔明 d 人點解咁得閒, 平日上堂唔見你咁多野講, 甚至唔見人... 但係今日個個都鐘意問!
出風頭? 冇分加的! 比你講嬴左又點? 做三分鐘的英雄? 多餘咯.

我地係第七組, 之後o既第八組, 可能多勁人, 比人問得仲勁, 最後演變成一場舌戰...

presentation 完左之後就落去執埋份 report, 之後就返屋企咯.

撘小巴見到源哥, 佢好似都幾多口的, 咁我講野都係小心 d 咯. 少少就住就住囉.
唔好亂咁講野喇, 尤其係同學之間o既野.

返屋企收到主席o既 icq msg, 佢投訴我o係咭片寫埋佢o既英文名喎, 咁就話要再印過喇.  慳返 d 錢啦~ 成日話冇錢~
其實佢改乜名都冇用, 我地只會記得佢叫阿 ball.

又要開始做功課啦~ 真係辛苦! 做完功課仲要溫書...

26 JULY 2004 - 準備不足

又係早早起身, 繼續做埋 d 功課佢先! 一做就做到十二點.

開始準備出門口, 首先要去睇下尋日筒菲林點先, 佢話有廿二張救得返喎! 還得神落.

返到學校都成點半咯. 慣性去 LG7, 冇人o既, 打比阿鴻, 佢未落黎... 仲以為佢地走晒.
今日食好耐冇食o既肉餅. 時間緊迫, 杯咖啡未飲晒喎, 咁拎個紙杯, 帶埋上去飲啦.

上到去已經遲到了, 今日o既課堂都差唔多完喇, 我 miss　左一兩張 slide 咋喎 =.="
講完書就review 同埋講 final exam. 真係好快, 個 course 真係好短, 4 個 credits 真係易賺.

account 人真係好得意, 連 exam o既 distribution 都講埋出黎, 即係邊一課會佔份卷o既幾多 %.

跟住就開始聽 presentation, 聽左兩組, 唔掂啦~ 玩玩下啦, 講野冇乜 point, 不過佢地好在 唔會緊張, 唔怯場.
平時化妝化到成隻鬼咁o個個今日個妝淡 d, 仲有 d 笑容, 似返個人呀.

落堂之後就同一班 groupmate 去 barn B, 繼續準備我地o既 presentation, 有我o係度都係會有唔少吹水時間, 冇所謂啦, 唔洗咁認真的.
咁就睇下我尋日影o既傑作啦, 我真係唔識欣賞!

o係 barn B, 見到梁雅鈞, 好耐冇見啦喎, 下次再見應該係八月底了~
見到佢即刻諗起我地 d 羽毛球拍! 哦~ 比晒阿鴻啦~
咁都好 d~ 佢住得咁遠, 唔通叫佢專登返黎開 locker 咩.

之前話想四個人負責 presentation, 最後屈左 kewchi, 佢係 yohoo 的上莊.

經過一次 rehersal 之後, 我地想搵個大 d, 少人d o既地方練 presentation.
首先返課室, 點知鎖左門, 跟住就去 IS lab, 幾經辛苦終於入到去, 但係... 駁住 projector o個部電腦要 password =.="
跟住去 math 人o既 lab, 冇鎖, 但係比人趕, 話過左 office hour 喎.
最後就去 barn C, 兩個 math 人話未聽過 barn C 喎, 哈哈~ 掂啦, 我地開到 projector, 可以練 presentation.
死啦~ 我對住 groupmate 都緊張, 聽日點算!? 我諗因為未準備夠o者.

返到屋企就打機! 打完機就攪下個 powerpoint.

今日 suki send 左一首<黑目>, 聽左幾次, 都 get 到首歌o既故事o既.

跟住就準備我o既 presentation, 準備好講乜野, 都 ok 喎, 慢慢讀, 希望聽日唔好好似開機關槍咁.

25 JULY 2004 - 斷尾

早早就起身溫書, 點知溫左一陣又覺得眼訓, 跟住又醒返, 都夠鐘出門口咯, 成果就係兩頁書...
今日又出去影相, 去大埔影相, 即係我三個星期前去錯o既地方! 都幾準時去到集會地點, 但係冇人o既...遲左五分鐘咋喎!

原來佢地都好準時出發, 好彩見到影友 bosch, 咁等埋佢o既一個 friend, 見過佢三次, 但係都未知佢叫乜野名...
咁三個人加埋一個影友甲中齊撘的士去大埔海濱公園, 呢個地方都幾靚的! 前年十月都去過一次.

今日 d model 都算係唔錯, 幾好, 一次比一次好.
影o既過程都冇乜特別野.

不過每每我拎部 lomo 機出黎, d 人都會問: 乜野黎架? 有 d model 都會問, 不過講你都唔知係乜啦.
影影下有個人問我係咪讀 TI... 原來佢以前o係柴灣 IVE 做的.

今日拎返花奔展用剩的菲林出黎影, 新奇o既事就發生了.
我影到第三十八張, 部機就回捲菲林, 但係出現 error 字眼喎!

咁我好衝動咁開左個蓋睇, 原來斷左尾!
咁點算呢? d 影友話用黑布袋慢慢拎返出黎就冇野啦, 咁個心都定 d, 但係又唔係好緊張, d 相可有可無吧.

個 function 完左之後就同bosch 同埋佢個 friend 去老麥坐, 跟住同 bosch 去埋旺角睇野.
其實根本就唔應該去老麥坐, 甚至去旺角... 首先我仲有好多功課未做, 仲未溫書, 仲有我要去晒相鋪救我我筒半死o既菲林.

同呢個唔係好熟o既影友又唔會有 dead air 架喎, 可能大家都有差唔多o既嗜好掛, 除左影相.

好彩返到太古城都係九點鐘, 岩岩好趕得切, 佢用"熟練的手腕" 幫我攪掂左, 仲問我有冇開過個蓋, 佢話有的話就唔知會點.
呵呵~ 我都唔知會點咯~ 尤得佢啦, 有就執返身彩, 冇都冇乜所謂, 應該係冇辦法!

返屋企食完野就開始做功課, 一做就做到三點. 仲要未做晒!

24 JULY 2004 - 超悶

 
一起身阿媽就話出去送殯, 咁我就自己攪掂啦.
食完野就去觀塘, 去到觀塘地鐵站, 出閘之前, 聞到好香o既咖啡味, 哦~ 原來開左間 starbuck.
攞完咭片, 就睇下 d 咭片先~ 將咭片 d 字改大左之後, 感覺好奇怪!
之後就返科大, 點樣返好呢? 我知地鐵去坑口轉小巴係快捷方便, 但係我都想一程小巴由觀塘返科大.
首先, 個小巴站都幾遠, 二來班次又疏... 點都唔係一個好選擇咯. 唔緊要啦, 返去要搵 francis, 佢都未得啦.

佢個電話冇電o既, 咁緊要o既時間搵佢唔到, 我要返我支閃光燈! 好彩johnny 同佢一齊.
o係等車期間, johnny 打黎話 francis 有緊要野講, 又唔講係乜喎. 咁我諗下係乜啦, 諗諗下就諗到我支閃光燈...

之後francis 又打比我, 真係支閃光燈... 塊散光片爛左... 最緊要柔光罩冇唔見o者~
我聽日要用架嘛~ 唔知點解今次又冇嬲喎... 古怪.

返到科大, 等 francis 等左半個鐘先出黎! 呢半個鐘有乜好做呢? 拎部相機o係 atrium 影相, 好似一個遊客咁.

走o個陣又唔記得將 d 咭片放入 locker, 咁就帶埋佢返屋企咯~

返到屋企又係打下機, 跟住食飯.
阿媽又食左野, 跟住又有 d 親戚上黎我屋企坐.

咁我就自己食喇, 今次係好特別的.
唔知點解我又唔搬 d 食物去電視機前面, 又唔搬 d 食物去電腦前面, 咁就一個人坐o係度, 對住幅牆食.
結論: 一個人食係好苦悶的!

唔知攪乜, 攪到十一點, 就開始溫書喇.

超悶的一日.

23 JULY 2004 - 奇怪的感覺

一起身繼續寫埋篇文, 寫到夠鐘就返學校, 做下 PROJECT d 野.
eric 話佢十二點半會返到學校, 我十二點半都未出門口...

返到去就打電話比 eric, 佢話食左咯, 一齊食嘛...

咁我搵佢地食啦~ 我知佢地一定o係 LG7 的, 咁就搵佢地啦~

今日 judy 都o係度喎~ 好耐冇見, 對上一次應該係七月二日了. 佢話我好似大隻左, 係咪真架?
係都唔係冇可能, 又或者係件白衫影響o者.
比d cosplay 相佢同阿禮睇下先~ 反應一至! d 人唔係好得, d 衫就幾得.

食完飯 judy 就去上堂, 我同阿鴻去 library 搵 eric.
suki 要搵account groupmate 開會, 唔係嘛, 開左好多次會啦喎~
真係唔好彩啦~ 換轉佢o係我o個組, 邊有咁多野做, 我o個組比較頹的.

入到 library 見到eric 啦, 好有學者 feel, 案頭上有很多的書本...
一齊睇下 d 書, 攪錯~ d 書唔掂的! 好似冇乜我地想要o既資料, 睇睇下 eric 就去左睇醫生.

再睇多陣我地都話要走啦~ 走之前 check 下 email 先, 又有 survey 做!
$200 六日, 每日兩個鐘... 人工好 un 咋喎~ 淨係填 form 都填到手軟.

之後就去游水, 今日有幾個人游, 有阿禮, sam, athena, 阿鴻. 感覺好似一個人游咁~

游完水之後就拉大隊出去旺角打邊爐, 今日有八個人: 我, 鴻, suki, cathy, judy, 禮, sam, athena.
唔知點解, 阿禮上唔到地鐵...佢打比 judy, 我就幫佢聽電話喇, 第一句係:"大家樂見啦"

打邊爐都冇乜特別野發生, 埋單 $125.

返到屋企, 攪下頭先影o既相.


今日比我見到我o既舊愛拖住佢男朋友, 係有 d 感覺的, 奇怪的感覺.
個感覺係尷尬多過唔開心...

就此問題我就同 suki 討論下, 今晚佢又做夜鬼喇~
佢話佢都試過有呢種感覺.

佢仲叫我只可以懷念呢個故事, 因為有好多開心o既情節.
但係好多時我只會諗到呢個故事最唔開心o個一段. 開心o既情節又唔夠多喎.
既然係咁樣, 希望我可以忘記呢件事啦~ 但係我咁好記性, 點會忘記到呢.
又或者可以話我長情.

呵呵~

22 JULY 2004 - 個人好愁 ?_?

 
今日好早起身, 好早就出門口, 約左 account o既 groupmate 返去傾野, 唔洗傾啦~ 都做好左咯~
咁坐左幾分鐘, 大家對下答案, 冇問題啦~ 咁就去barn b 繼續做野啦~

都話左七個人太多, 就算有三個人冇到, 都要有人兩手空空, 今次到我兩手空空, 兩袖清風了.
咁就同阿恆吹下水啦, 乜都吹一餐. 後尾 kerry 都黎埋, 都係冇野比佢做的.

吹完就同佢地食飯. 佢地都做左好多野啦~
一齊食飯, 咁就出事啦~ 大家唔係好熟, 有些少 dead air 喎!
唔知係咪語言o既問題, tony 好少講野. 佢會唔會唔聽唔明我地講野?

跟住就係去上堂, 放 break 我就拎星期日o既 cosplay 作品比大家睇. 大家意見相近吧, 都係覺得多數 cosplayer o既樣都唔得, 所謂人靠衣裝嘛!
suki 提議應該用 DC 影, 淨係影佢地件衫, 咁衰架~ 哈哈~
落左堂又係傾野. 其他組都差唔多啦, 要做快d 呀!
o棄住黎做, 笑住黎做, 一邊做, 一邊又睇下相, 最後做到七點, 都差唔多啦, 咁就收工啦~

返屋企途中, 美姨打黎問我出唔出街食飯, 媽媽今日又好似唔煮飯喎~ o個陣係七點半左右... 未夠鐘食飯, 但係今日有少少餓啦. 今日都係怪怪的, 一時又好似好飽唔想食野, 一時又好餓喎~

去邊度食呢? 去美心食. 佢提議去大家樂, 唔好掛... 我日日都食大家樂...叫左o個 d "即叫即炒小菜", 都幾好食的.
食完就去百佳行下, 睇下有乜想食啦. 玩野! 食到飽飽, 問我想食乜? 冇乜野想食呀, 最後買左雪糕, 因為係咖啡味.

行行下百佳, o個 d 唔開心o既野突然o係腦入面浮現左一陣! 點解呢? 有乜野觸發呢? 唔知.

跟住就返屋企, 坐左一陣, 都係唔得啦, 訓陣先! 訓左個幾鐘啦.

醒左之後就 icq 啦, icq 真係 kill time o既好工具!
搵 tracy 問野, 點解問佢呢? 因為佢係女人.

queenie send 左一首方力申o既<拖拖拉拉>比我, 哎呀~ 聽多幾次, 首歌o既 mood o既問題, 聽到個人都愁晒.
我聽歌慣左聽歌詞, queenie 就慣左唔聽.

唔知點解今日個人好愁 ?_?

仲有一個問題我同 queenie 討論過, 結論係佢叫我放開自己喎~ 哈哈~
真係做到的話就不錯, 唔易架~ 呢個世界好多 constrain.

阿媽話今日買六合彩, 中左三個半, 即係有$160, 幾好幾好~ 印象中好似未試過.

21 JULY 2004 - 冇考試o既氣氛

今日唔洗上堂, 又冇人陪我打羽毛球, 咁就唔返學咯~
唔返都好, 出面橫風橫雨呀! 訓緊覺都比落雨d 聲嘈醒.

我今日突然想食肯德基, 阿媽又提意去肯德基, 咁就好啦! 就去肯德基!
今日佢又突然提起免入息審查貸款o既問題, 我的確係辦事不力o既...

睇埋新聞先出門口, 今日就報導一個肯德基o既雞隻供應商, 虐待佢 d 雞喎~ 我即刻諗: 肯德基o個 d 唔係試管雞黎架咩?
唉~ 我一陣就出去食架啦! 唔好比 d 咁o既野我睇啦.

今日同埋剛舅舅 一齊食, 佢埋單架~ 真係唔抵食, total 食左 $90 蚊, d 野普通咋喎~

食完野就同阿媽行一下, 首先去永安, 真係好多新奇有趣o既設計! 例如一個放廁紙(一筒筒o個 d)o既架, 如果淨係得支軸, 咁就拉唔斷張紙啦, 只會令個筒係咁轉.
除非用隻手禁住, 佢就有個手柄, 一咁制就可以fix 死個筒, 唔多實際, 但係幾得意.

跟住佢話想去 UNY 睇十蚊野, 去o個陣佢都話唔知有冇, 哇~ 好彩冇o者~ 有 d 悶呀我~ 哈哈~

返到屋企就要改咭片o既設計, 落埋單, 不過冇人打黎 confirm o既...
改完就開始做 account, 呢樣係好突然的! 我打緊機, 有位 groupmate 話我知條數有 d 問題.
咁我就睇下 d 數, 順便將 d journal entries, t-account 打埋落去.

跟住又打陣機, 跟住就食飯, 之後又係做 account... 又打機.... 今日就過左啦~


今日學多左一句野:
"冤煙豬頭都有聞鼻菩薩"
真係今日先第一次聽. 事源 suki 比左幾隻英文叫我幫佢譯, 直譯又唔係, 跟住佢講個意思, 我就去問下人啦.
咁 icq 左兩三個人, 個個都答到我的. 係我孤陋寡聞乜都唔知...


今日本來有一個溫書大計, 就係全日溫! 最後都係冇做到, 都係因為懶, 都冇o個種考試o既氣氛o既~

20 JULY 2004 - 真係苦的!

原本想早 d 起身, 早d 出去晒 cosplay 相, 但係我訓到好遲, 呢個計劃就要取消了.
咁唯有要媽媽代勞啦, 首先我要拎筒菲林去晒相鋪, 然後再返屋企放低張紙叫媽媽一陣幫我拎, 先再返學, 煩死...

返到學校, 首先要去 barn B print notes, 見到阿婷一個人坐o係度咁悶, 咁就比上次大澳影o既相佢睇啦~
希望可以幫佢解悶啦.

要去 LG 7 搵 cathy 坐邊先, 搵唔到 cathy, 見到阿 tim, 跟住我又o係 LG7 行左個圈, 見到 cathy 同 max 啦~
原來咪又係阿 tim 隔離o個張台... 超攪笑!

呢張台... 係有問題的! 舊 target o既男朋友就坐o係呢張台啦~ 哈哈~
是但啦~ 唔係同台已經好好架啦~

買左飯之後, 就開始食飯喇.
阿 max 話佢讀 sosc102 同阿婷一組喎~ 咁我梗係要介紹下佢啦~
一邊講, 我一邊食涼瓜牛肉, 真係苦的!!!!!!!
點解會咁架? 我唔係已經放低左咩? 應該係的!

食完飯又去左上堂.

suki 話 year 2 個 fanny 話得八十幾分唔多開心喎~ 仲未睇化, 真係辛苦...

落堂就同 account o既 groupmate 傾野, 相對 suki o個組o個個真係暴君, 我覺得我o個組好好啦~
佢地真係同一個人一組冇乜分別! 雖然七個人做呢份 project 真係多左 d...

傾左成個鐘, 我夠鐘去開會啦! 好耐冇同 photosoc o既人開會喇! 都唔齊人啦~
個個都有原因, 個個都有事做, 其中有一位就真係好出位, 話我約六點開會, 起碼六點半先齊人, 而佢七點就要走, 所以就唔黎喎. ?_?
人就多一個唔多, 少一個唔少. 個會都係冇乜效率, 我地唔夠認真, 咁都好呀~ 細soc 黎之嘛, 咁認真做乜.

開完會就落 seafront 食飯, 原本有三個人, 我, 金迪, tim, 點知呀tim 接到個電話之後, 就買外賣, 留返我同金迪!

金迪話我影o既人像相越黎越單調, 次次都一樣, 睇到悶了.
點先可以影好 d 呢? 不過近期我影相, 都冇乜心機影, 下次試下比多 d 心機, 睇下會唔會好 d 啦~ 我諗都唔關事的

金迪話我頭先開會o個陣突然間好惡, 咁樣會嚇親人... 真係有? 我要留意下先!

今日開過兩次會, 返屋企就打返兩份 minute.

返屋企睇返d cosplay 相, d 色唔得呀! 柯尼卡o既問題! 間鋪頭用柯尼卡的! d 相得唔得呢? d 人一般啦, 打扮就真係好得! 我影得好唔好呢? 唔係咁好.

19 JULY 2004 - 睇到我覺得好開心

九點就彈起身! 好辛苦, 眼訓都唔可以比自己再訓, 要做功課呀! 個腦識得轉, 但係個身體好似唔聽駛咁.
快快趣趣咁做完份功課, 咁就開始做個 case analysis 啦, 好彩有 source, 效率增加 1000 %.
由頭開始做, 不過最後份 balance sheet 埋唔到數o既, 算數~ 一陣返去同 d groupmate 捉錯處.

今日要帶埋部相機返學, 要幫 SU 影inaug. SU... 我淨係記得個主席睇鹹片咋~ 除左帶相機, 仲要帶恤衫西褲皮鞋, 真係麻鬼煩!
雖然話有錢o者, 如果唔係應承左 johnny 我真係返屋企訓覺好過. 好彩走o個陣個天冇落雨, 仲要見藍. 之前仲落緊大雨架嘛~

返到去搵大隊食飯, 今日好細隊, 得阿禮, 學而同阿鴻三個人. 食完飯就去上堂.
都預左上堂聽唔到乜野架啦~ 唔夠訓就係唔夠訓. 呆下呆下就呆到放 break 啦, 佢呢個時候派卷, 八十幾分... OK 啦~
考o個陣都知大概考成點. 好快就落堂啦~ 同一班 groupmate 搵錯處, 都係我做得太急, 抄錯左個數, 仲有因為對住份 source, 入漏左個數.
最後大家埋到數, 唔知點解會有一種成功感, 哈哈~ 太攪笑了, 我地冇理由埋唔到架嘛! 有份 soruce 喎. 哈哈~

攪掂之後我就去 barn B, 入埋 D data, johnny 就殺到喇~ 搵個地方換衫, 就落去 LTA 影inaug.
SU 個 inaug 都好o棄下, o棄過 econ soc 先, 仲要冇乜guest, 咁就唔好 book LTA 啦, 咁好明顯睇到冇人到... 佢仲要任我走, 任我發揮, 影到冇野想影, 好彩, 夠鐘啦~ 唔洗再諗點影了.

好肚餓呀! 雖然現場有到會, 好香架~ 但係我覺得我今日o既身份係helper, 唔係guest, 唔食!

影完之後, 去 sport hall 搵 francis, 想比支閃佢.
叫佢又唔聽, 佢做緊 camera man, 影緊中六生o個 d o'camp.
佢地跳緊 camp fire, 跳緊成吉思漢, 好得意, 睇到我覺得好開心, 我諗返上年o'camp 我都係傻下傻下咁o係度跳呢 d 舞, 好快又有得玩咯~
我仲拎部 DC 出黎拍左片.
咁快又一年咯, 好快就畢業, 要搵工啦~

攪掂左就落 seafront 食飯, 過左食飯時間, 都冇胃口食咯~ 食車仔麵啦~ 幾好食呀~
同 johnny 食食下飯見到大佬, 咁就一齊啦, 仲傾左兩句.

食完野就返屋企, 著住恤衫西褲真係幾辛苦, 好彩今日唔係好熱吧.

返屋企都係o棄, 時間都唔早啦~

星期三o既羽毛球外交要 postpone 啦, 好多人星期三都有 mid-term, 下個星期三先咯~

18 JULY 2004 - 唔抵可憐

一起身, 發下呆, 攪下新o既日記網頁. 咁就同阿媽出去食老麥.
上個星期都做左一樣o既野... 返到屋企又係打陣機先, 都未想溫書.
見時間尚早, 有 d 唔抵得o既感覺, 點都係唔想開始溫書.
到五點, 覺得時候唔早, 咁就開始拎d 野出黎溫, 然後就做功課.

就o係呢個時候收到 suki o既電話, 話o係學校見到 d 人著得好靚, 又有好多影相佬喎~
我知~ cosplay 嘛~ 動漫 soc 攪架嘛~ 佢又講到好似好好咁.
咁我就受唔住誘惑, 想出門口喇. 五點幾出門口, 返到去都係六點, 都仲有一個鐘, 都可以燒一筒菲林的!
咁就起行啦! 一返到去, 見到車站有一堆人排隊, 仲有 d cosplayer 喎! 開始覺得自己戇居左了!
一返到黎人地已經收左工, 唔通我收錯風!? 咁我咪..... 好彩去到 atrium, 望落 LG 5, 好彩都仲有人影相.
我都唔知點行, 行左去 LG5 停車場o個邊, 我居然要問路, 問人點行返出去. 真係唔好意思話比人知自己係科大o既學生.
科大係我主場, 冇理由要問人路架!

第一次影 cosplay, 真係唔識規矩! 見 d cosplayer 企o係度, 究竟係咪比人影架? 又見到 d 人點頭, 又有乜野意思呢?
咪理啦, 見有人影我就影埋一份啦, 我知咁樣唔好玩架啦, 咁返到黎冇理由唔影架.

有 d cosplayer 都幾靚女架, 有 d 就麻麻, 不過個 focus 應該係佢地o既衣著!
雖然我唔知佢地模仿緊乜野, 不過都幾似卡通人物.
佢地都要好有勇氣, 先可以著到咁行出黎, 比人影.

影完就返屋企, 返到屋企就同阿媽去太古城中心, 搵電話咭, 又或者轉台, 三心兩意, 又覺得自己用緊o既 plan 唔係好抵.
又好似冇更平o既選擇...但係呢個台煩在要增值嘛! 唔增值就停左個台. 最後都冇轉啦, 去增值.

出街之前諗住八點半要返到屋企睇無線播波, 準時. 點知場波係八點鐘開波架!
算啦, 好過冇.
睇完先食飯, 食完飯先開始溫書... 情況都幾危急, 又未做功課, project analysis 又未做...
但係我仲要堅守原則, 要拎本書出黎, 睇完佢先.

攪到三點半... 都未攪掂... 自作自受啦~ 星期五開始都冇野做, 都唔溫下書, 攪到今日咁... 唔抵可憐呀!


唔...
我o既好朋友係咪唔開心呢? 希望佢快 d 冇事啦! 人地唔開心我都會唔開心埋一份. 好似 911 咁, 同我冇直接關係架, 但係我都會唔開心. 怪.

17 JULY 2004 - 思想家

一起身就比阿媽捉左去飲茶, 去以前o既"漢堡大酒樓", 依家唔知叫乜名了.
"漢堡大酒樓"太出名啦, 記個新名都冇意思啦~

呢間野唔掂啦~ 我地拎左飛, 號碼係 161, 好易記, 即刻諗起"一樓一", 企門口o個個姐姐都有 d 似"一樓一"
佢嗌到 163, 我地問返佢, 161 呢, 佢話嗌左啦喎~~~~ 嗌左的話冇理由我同家姐兩隻耳都聽唔到的!

入到去, 埋位啦, 我地要五張?, 其中一張仲要冇椅背o既! 攪左好耐先搵返張正常o既比我地.
想叫野食, 發覺得兩set 點心紙, 點解乜野食都冇架? 蝦餃, 燒賣, 叉燒包都冇!? 原來咁岩用晒.

d 野又唔係話好掂, 真係吹漲!

今日滿枝阿姨都有黎, 講起佢個去左外國讀書女... 佢好似連自己都照顧唔掂, 真係唔敢想像一個人出國會掂.
比著我一個人出國, 我會好驚, 蕩失左路咁點算!?

返到屋企都唔知做過 d 乜咯, 都係打下機, 時間咁就過左. 等到八點半睇隔世追兇.
有得o係屋企睇電視都要多謝尋日個風球, 如果冇打風, 冇落雨, 呢個時間應該踢緊波了. 踢波咁大誘惑我係唔會抗拒的.

睇完隔世追兇, 睇下 d 人點樣評呢個結局, d 人話估佢唔到, 又話幾年以黎最好係呢套.
我又唔識分邊套好邊套唔好, 總之呢套就係幾好睇.

呢套片幾有創意呀~ 雖然我唔知佢抄乜野橋, 不過好多情節都係估佢唔到.
最攪笑就係阿媽唔係好明呢套片講乜. 解比佢聽都晒氣啦~ 唔明就算啦, 由今日開始呢個唔再係問題咯~

睇完就開始做思想家. 我發覺呢幾日, d 唔開心o既經歷會o係腦海中出現返, 乜野唔開心o既野呢? 都係上個月o個d 野.
諗返起都會覺得唔開心. 咁點解會諗返呢? 有乜野觸法呢? 我都唔知啦, 要心理專家先答到我.

我就問 queenie 呢個問題啦, 佢就話呢樣野會一生一世喎~ 唔好嚇我喎! 唔好形住形住希望冇事啦.
之後就繼續同 queenie 討論日記o既問題, 咁就攪到佢冇得溫書啦~ 哈哈~

我又o係度諗, post 上網o既日記, 慣性都會 post d 唔 post d. 痴痴地, 寫完又唔 post, 履行"日記係寫畀自己睇o既".
其實唔係乜都可以隨便公開講的, 講錯少少都會好麻煩, queenie 講的.
隨便講的話可能會傷害到人, 又可能會變左做謠言.

有時又會諗, 咁o既做法係咪對當事人唔尊重呢? 咁又唔係o既~ 樣樣野都有底線o既.

謠言呢樣野呢, 我有一個講法, 好清高o既講法, 把口生o係人地度, 隨便佢地講啦~
萬一主角係自己, 咁我又未必可以做到咁清高. 真係可以做到咁清高就好咯~