十二月廿五日 - 悶死了~~~

好似好耐冇放過假啦~~~ 自從十二月開始, 晚晚返到屋企都要溫書, 仲有星期六日都係留o係屋企溫書, 真係好辛苦好辛苦~

溫咩呢? 話說我九月開始, o係"香港第一學府"開始讀 part-time master. 每個星期有兩日為左去上堂, 要早 d 收工, 唉~ 我知呢樣公司最唔鐘意啦~ 唔鐘意都冇計啦~ 我要讀 master!!!

以前讀 full time, 考試之前有成個星期唔洗返學, 日日溫, 溫到唔想溫都得. 依家讀 part-time 邊有d 咁o既野, 雖然只係應付兩科考試, 但係都覺得好攞命!

呢度讀書有咩好呢, 冇功課做啦~ 冇 mid-term test 啦~ 仲有校院內有間 STARBUCKS, 上堂之前可以買杯咖啡飲. 仲有就係返工o個頭有架忘命小巴, 所以由公司返到學校都係半個鐘多 d. 最緊要就係個名好聽.


溫書o個排, 想快 d 考完試, 今日考完啦~ 好似無所事事, 真係唔知有乜野做, 真係悶死了... 唉~~~

十月廿一日 - 原來我真係好 out...

呢幾個月, 每個星期六晚都會留意無線播o既卡通片, 有, <死亡筆記>, 仲有重播o既<魔剎>. 呢幾套片對我黎講都好新鮮!

一邊睇一邊會問: "naruto 入面o既 我愛羅 會唔會打輸", "死亡筆記入面o既 L 會唔會死".

其實早o係讀科大o既第一年, 即係 2003 年, 源哥已經同我講"寫輪眼" ( 入面o既名詞), 即係佢o係四年前已經睇緊, 而我呢, 竟然當佢係 d 新野...

而死亡筆記, 連電影版都落左畫啦, 仲問 L 會唔會死...

其實依家有 youtube 真係好方便, 連卡通片都有得睇, 可以由頭睇到落尾, 唔洗個個星期六等電視台播.



我問同事: "L 到最後會唔會死?"

同事: "唔會死, 點會死o者..."

我: "真係唔會!!!???"

同事" "L 點會死呀? 要死都係 A 死 或者 Z 死先啦"

我: "哦~ 又係喎~"

第三次去泰國 (八月四日至八月八日) - 後記

呢五日裏面, 我同團友o係意見上有無數o既分歧, 能夠帶住一位o係意見上咁多分歧o既團友去旅行, 我覺得我真係唔簡單呢~~~

由於我帶o既地圖唔岩比例, 仲有就係資料上o既出錯, 所以好多時我地都要搵路... 其實我覺得搵路係幾好玩o既一件事, 當走到腳軟之際, 突然發現目的地原來就o係面前, o個種滿足感真係講唔出口!

好可惜o既就係, 我專登帶部專業相機去曼谷, 再去大城, 但係個天係陰陰沉沉, 仲落住毛毛雨. 我覺得影風景相, 一定要配個藍天.

五日o既旅程, 總算係無驚無險咁渡過, 去到最後o個一日, 我真係唔捨得, 唔捨得迷人o既曼谷.

如果問我仲會唔會去泰國, 我o既答案好肯定, 係會! 去過三次啦喎, 咁咪去第四次囉~~~~

我好想試下泰國o既海鮮!


至於我仲會唔會同呢位團友去旅行呢... 去泰國就一定 no chance 囉, 去第二度就唔知了...

第三次去泰國 (八月四日至八月八日) - Day 5

最後一日, 真係有 d 唔捨得曼谷. 時間真係唔見洗, 因為下晝五六點就要飛.

食過早餐, 首先 check out 間房先. 跟住我地去 big c 行下, big c 個超市好多野賣, 我都買左唔少泰國零食, 仲有就係即溶咖啡.


Big C 入面o既餐廳, 叫"陰濕"

行完之後, 我地又去食海南雞飯. 跟住又去返 central world (第一日行過o既商場)行下, 臨走前, 再去拜四面神. 希望心想事成.



真係好唔捨得離開呢度...


臨走前, 同泰版麥當勞影返張相先 (團友報料, 影呢張相o既時候, 後面 d 人o係度笑我, 我係鐘意自拍, 唔得咩!?)

曼谷之旅到呢度都接近尾升了, 我地搵左架的士, 話去機場, 唔洗講價, 300 baht 就 ok. 上左的士, 司機叔叔無端端講 "toll way", 醒起胡慧沖o既 video 話過, "toll way" 即係高速公路, 我就答佢 "chai toll way", 即係上高速公路啦. 無端端, 司機叔叔又話" 酷涉哈" (泰文的六十五), 又記得 video 話過, 唔似香港, 路費係要乘客比架, 即係比錢佢啦~~

好快就去到機場, o係入面o棄下o棄下, 等夠鐘就上機了...

睇旅行書話, 要準備 700 baht 比機場稅, 但係呢, 由入到機場到上飛機, 都冇人同我地收機場稅... 唔通本書又老點? 是但啦~ 慣架啦~~~

就係因為本書, 所以我o係街邊o既找換店 (係當地o既銀行經營o個 d) 唱錢, 當時匯率有 4.235, 比起第一日花時間搵o既 super rich 有 4.3. 其實真係差好少. 即係每 $1 HKD, 可以賺 0.065 baht, 當我換 $2000, 都係賺 130 baht, 即係唔夠 $50 HKD. 想講乜野呢? 第一日專登搵 super rich 實在係戇居呢~~

第三次去泰國 (八月四日至八月八日) - Day 4

今日o既目的地係大城 (ayutthaya), 點解想去大城呢, 我之前見到 d 人去大城影相, 真係好靚好靚~~~

大城係乜野地方呢, 佢位於曼谷以北 86 公里, 係以前一個皇朝o既首都, 但係經過戰亂, 所以好多古蹟都爛爛地, 同埋好多冇頭o既佛像... 我就係想影呢 d 古蹟~~~

首先我地坐 BTS (空鐵), 跟住再轉 MRT (地鐵), 去到一個幾有特色o既火車站. 買一張 15 BAHT (唔洗 $4 HKD) o既車票, 就上火車了. 唔洗兩粒鐘, 就去到大城了.



火車站留影


火車票

15 BAHT 真係好平架, o係曼谷, 佢空鐵或者地鐵, 一個站都要 15 baht!!!



一落火車, 有好多"芒果人" 同你講野, 話唔知幾多錢就帶你遊晒咁多個 wat (寺), 當然o係火車站開價o個 d 梗係貴 d 啦, 網民話要坐船過對面海先再搵.

好容易就過到海, 跟住就搵左架三輪車 (o個度o既一種的士), 討價還價, 500 baht 兩個人, 佢會帶我地遊晒咁多個 wat. 嘩~~ 真係好宏偉!!! 我專登帶左部大相機去影相, 可惜天色唔靚, 全日都係天陰陰. 我一邊影, 團友四哥就話好悶, 真掃興...


我就係想影呢 d

影左唔夠兩個鐘就離開大城了. 為左想坐得舒服 d, 我地選擇坐大巴. o係泰國坐大巴, 我一 d 都唔覺得危險, 唔似o係大陸咁, 驚死成車都係賊...


大巴入面

唔知坐左幾耐, 去到巴士總站, 跟住再坐 BTS 去 siam (唉~~ 又係 siam), 我地睇住旅行書介紹, 去左 novotel hotel 入面一間叫 square o既餐廳食自助餐, 去之前擔心會唔會冇位坐架 (o係香港, 食乜野自助餐都要 book 位嘛, 越貴o個 d 就要越早 book 定先), 入到去, 個場都幾冷清... 冇乜人架咋, 泰國人冇咁富貴. 講返 d 野食, 我覺得幾有水準, 同香港o個 d 酒店自助餐有得 fight, 埋單唔洗二百蚊.





食完野, 又去 siam paragon 行下, 買左杯雪糕食.



咁快就第四日, 聽日就 last day 了, 我唔係好捨得曼谷呢個地方!!!